دبى هى واحده من اجمل المدن السياحيه فى دوله الامارات العربيه المتحدة وتتميز بالهندسه المعمارية العصرية والشواطئ الخلابه ومراكز تسوق ومولات ضخمه والحدائق العامه التى تعبر عن جمال وروعه دبى ويأتى اليها كل عام الكثير من السياح لقضاء الاجازات.
7 حاجات لازم تجربوها في دبي 
والاماكن و الاسعار:
والاماكن و الاسعار:1- رحلة هيليكوبتر
المكان: اتلاتنس
السعر: يبدأ من 600 درهم
المدة ببتفاوت من 12 دقايق لحد ساعة وطبعا كل ما المدة بتزيد السعر بيزيد
ودي بالنسبالي كانت بديل لبرج خليفة ، لأن برج خليفة الناس بتطلعه عشان تشوف الفيو بتاع دبي من مكان واحد وخلاص، انا في الهيليكوبتر رحت يعتبر كل حتة في دبي من خور دبي، برج العرب، وجزر العالم، ونخلة الجميرة، ودبي مارينا، ومنطقة الخليج التجاري، وبرج خليفة، وغيرها من معالم دبي الشهيرة و كنت لابسة السماعات الكبيرة دي و كابتن الطيارة كان بيقول كل المعلومات عن كل مكان بنروحو فكانت بصراحة تجربة ممتعة جدا وارشحها لاي حد حابب ياخد سيتي تور في دبي من السما
2- الاكواريم و حديقة الحيوانات المائية
المكان: دبي مول
السعر: 150 درهم اونلاين بدل 300 من الباب
المدة: طول اليوم عادي
والمكان دا مهول بطريقة مش متخيلنها فيه اكتر من 10 مليون لتر ماية أكثر من 33 ألف كائن بحري و بتقدروا تعملوا انشطة مختلفة هناك زي الغوص مركب و غيره انا فعلا استمتعت هناك جدا و عملت عنه فيديو كامل عن تجربتي هناك رحت ازاي، جبت التذكرة بنص التمن منين ،و حبة نصايح ومعلومات تانيين
3- واتر بارك واكواريم اتلاتنس
المكان اتلاتنس
السعر 250 درهم
المدة يوم كامل
دي تصنف رقم واحد في دبي و من ضمن اكبر الواتر باركس في العالم او على الاقل فيها واحدة من اخطر اللعب الي في العالم والي انا شخصيا جربتها و متأكدة ان قلب وقف جزء من الثانية من كتر الخوف
كمان عملت فيديو كامل عن تجربتي هناك و كل اللعب الي جربتها تقدروا تشوفوه من قناتي على يوتيوب Rahma Egyptian Traveler
المكان في اكتر من 30 منزلق ووجهة ترفيهية وكمان في هناك اكواريم تاني بيكون انكلوديد في التكت معاكم و حرفيا الديزاين جوة بيحسسكم انكم في العصور القديمة يعني اسمتعت بديزاين المكان اكتر ما استمتعت بالكائنات البحرية هناك
4- دبي مول
استنوا استنوا عارفة اني قلت بعيد عن الكليشيهات و دبي مول يعتبر من اكبر الكليشيهات يعني
بس حابة اوضحلكم حاجة انا مكنتش عارفاها قبل ما اروح، مبدأيا كده المول و برج خليفة و النوافير المشهورة دي كلهم في مكان واحد وبيتقال على المنطقة نفسها دبي مول ثانيا جوة المول نفسه في الكواريام و الاندر واتر زو، في حلبة التزلج و كيدزانيا للأطفال وصالات سينما. وطبعا كمية مطاعم في كوزينز من كل انحاء العالم موجودة هناك
فحرفيا هناك اليوم ممكن يبدأ بانك تفطري فطار هندي مثلا تروحي الاكواريم واندر واتر زو تتغدي تايلندي، بعدها تروحي تتزلجي او الي هو سكيينج يعني، وبعدين تطلعي برج خليفة مع الغروب بعدها تحضري عرض نافورة دبي وانتي بتتعشي لبناني و اخر اليوم تجربي السينما هناك الي الكل بيقول عليها تجربة مختلفة جدا هناك و بعدين تروحي تاخدي شنطتك وتطلعي على المطار لأن فلوسك كلها هتكون خلصت اليوم دا و السلام عليكم
5- شواطئ دبي
السعر: مجانية
دي بردو حاجة تانية ممكن تتعمل هناك في شواطىء كتير ممكن تتراح هناك زي شاطىء جميرا ، كايت بيتش، شاطىء الجي بي ار او مارينا بيتش، سنست بيتش و في كمان شاطىء للسيدات في كل الالعاب الرياضية سبا كلاسيس رياضة زومبا يوجا و مطاعم بردو انا مرحتش غير مارينا بيتش بصراحة و سمعت ان افضل شاطىء هو كايت بيتش
6- برة دبي راس الخيمة و تجربة الZipline
المكان جبل جعيس راس الخيمة
السعر 250 درهم
المدة دقيقتين 3 حسب وزنك و الرياح اليوم دا
دي كانت اخر حاجة عملتها في دبي و من اكتر الانشطة الي مش هنساها الي عملتها في حياتي خصوصا ان الزبلاين دا اطول واحد في العالم فكان احساس حلو بالنسبالي يعني وبردو شوفواا تجربتي كاملة من يوتيوب
7- حتا كاياكينج
ودا كانت اكتر مكان مخططة اروحه في الامارات لكن للاسف عشان وقتي مقدرتش بس دا مكان انصح بيه للناس الي بتحب الطبيعة و هتحب تفصل شوية بعيد عن المدينة و الزحمة
تعليقات
إرسال تعليق