سوف نستعرض اليوم تجربة الحصول على تأشيرة شنجن للسفر ودخول العديد من الدول الاوروبيه الشهيره مثل فرنسا وايطاليا والمانيا والتعرف على ثقافات وحضارات الدول الاخرى .
وبما ان المؤشرات بتقول ان السفارات قربت تفتح وفي بعض السفارات بالفعل فتحت بشروط
ففي بعض التركات لازم تاخد بالك منها وانت بتقدم علشان دي هاتفرق كتير في قرار القبول والرفض،
اولاً: ايه هي تأشيرة "شنجن" هي انك بتقدر من خلالها تدخل دول الاتحاد الاوروبي وهي ٢٦ دولة، من غير اي قيود او حدود بتختم من دولة اصدار التأشيرة وتخرج من اي دولة تاني.
ثانياً: مفيش سفارة اسهل من التانية للحصول عل التأشيرة كلهم بيتبعوا نفس المعايير لاصدار الفيز
ولكن في بعض السفارات المؤشرات بتقول انهم اعلى دول اصدار للتأشيرات عن الباقي ودا لان الطلب عليهم اعلى بكتير وكمان لانهم دول سياحية من الدرجة الاولى وهم " فرانسا، وهولندا، اسبانيا، ايطاليا، المانيا"
الشروط الروتينية المطلوبة:
-جواز سفر ساري لمدة ٦ اشهر
-صورتين شخصية خلفية بيضاء
-تأمين صحي يغطي مدة الرحلة
-حجز فندق مؤكد *مهم جدا
-حجز طياران مبدأي
-خطاب من جهة العمل HR يوضح وظيفتك ومرتبك ومدتة عملك
-ولو انت صاحب عمل تقدم سجل تجاري وبطاقة ضريبية
-ولو طالب اثبات قيد جامعي
-كشف حساب بنكي لمدة لا تقل عن ٦ اشهر
-جواب تشرح فيه الغرض من السفر و Itinerary بالتفصيل
بالاضافة الى اي اوراق تانية تثبت انك راجع بلدك من املاك
كدا خلاص لا طبعا الكلام المهم بقى عن تجربة،
لو انت بتقدم بدون اهتمام قوي وتقول هاجرب حظي انصحك بلاش لانك هاتترفض
قبل ماتقدم خطط كويس جدا وحط مجهود كبير علشان اما تقدم وحتى تترفض يكون سبب مش كبير تقدر تصلحة اما تقدم تاني ويكون سبب قبولك، لان السفارة لو اخدت عنك فكرة سيئة دا هايبقى صعب انك تاخد التأشيرة بعد كدا،
وبلاش تقدم في اكتر من سفارة ركز على سفارة وحدة وشوف اسباب الرفض وعالجها وقدم على نفس السفارة
وبعدين نعمل ايه هاقولك اهو
اهم حاجة وانت بتقدم هي الاتساق بين هدفك من الزيارة وخططة رحلتك وبين الاوراق اللي مقدماها لازم يكونوا متناسقين 100%
زي حجز الفندق لازم يبقى بنفس عدد الايام اللي انت مخطط تقعدهم هناك وكمان تاريخ الذهاب والعودة في تذاكر الطياران يكون بنفس تواريخ الفندق،
كمان كشف حسابك لازم يكون فيه حركة شهرية بنفس المرتب اللي مكتوب في HR
كمان اما تقدمله مصدر دخل اخر زي ايجار محل او شقة لازم يكون حسابك بيزيد بنفس قيمة الايجار اللي مكتوبة في العقد ويفضل الشخص اللي مأجر منك العقار او ايا كان هو اللي يودع لك الفلوس في حسابك وبكد بتكون في حركة في كاشف الحساب باسم الشخص المؤجر منك واللي اسمه مكتوب في عقد الايجار ودا عن تجربة شخصية
كل دا بيثبت مصداقيتك عندهم وانك فعلاً مسافر وراجع
وبالنسبة لكشف الحساب مش لازم يكون كبير على قد ما يكون عليه حركات سحب وايداع طبيعية وليست عشوائية وتكون متسقة مع دخلك الفعلي انا قدمت لواحد صاحبي كان حسابة ٢٨ الف بس
يعني مش تجيب فلوس من حد وتقعد تسحب وتودع فيها عشوائي، لان عندهم في السفارات محاسبين بتفحص ورقك وتشوف هل هو متناسق مع دخلك ولا لا
ولو انت مقدم سياحة احجز في اكتر من مدينة لان مش منطقي تقدم على اسبوع مثلا واقعدهم كلهم في مدينة وحدة احجز ٣ ايام في مدينة و٤ في مدينة تانية
بالنسبة لي انا شخصيا قعدت اخطط لاكتر من سنة قبل ما اقدم مجهود كبير جدا حطيته والحمدلله اتقبلت،
انا عايش في قرية ومش موظف كمان بس بتشتغل في الزراعة مع والدي ولكن دا مش هاينفع لان مش منطقي اروح اقدم واقولهم باشتغل مع والدي هايقولي انت بتشتغلني
اثبت بسجل تجاري وبطاقة ضريبية عملي دا في الزراعة ولان شغال لحسابي الخاص في دخلي مش ثابت يعني موسمي فمش منطقي كل شهر اعمل ايداع في حسابي او ميعاد معين كان كل فترة ايداع بس كبير شوية والسحب كان طبيعي جدا اثبت ايضا دخل اخر من خلال عقد ايجار ارض زراعية والشخص المؤجر مني كان بيودع الايجار باسمه في البنك فبتنزل حركة باسمه في كاشف الحساب دا التنسيق اللي بقولكم عليه
كمان حاجة مهمه لو انت مقدم لاول مر ابحث عن مؤتمر او معرض مناسب مع شغلك وهات دعوة باسمك للمؤتمر دي حاجة مهمه جدا جدا انهم يوافقوا على التأشيرة لانك رايح لغرض تطوير واكتساب حاجة هاتفيدك وتفيد بلدك ودا اللي انا عملته
خلوا بالكم من المعلومات دى عشان مهمه وانتوا بتقدموا وربنا يوفقكم وتسافروا وتستكشفوا الدنيا الكبيرة دي
السفر ثقافة
السفر حياة
السفر مغامرات جديدة
السفر سعادة
السفر "تعليم" اكبر مدرسة
تعليقات
إرسال تعليق