حديقة الحرية واحده من اجمل حدائق القاهرة

 المقال ده هتكلم ازاي تدر عليك وتكتسب دخل أضافي أو أساسي من خلال البيع الاونلاين

مبدئيا كده ، في ناس بتكسب ملايين من خلال البيع الاونلاين وفي ناس مبتكسبش ومبتكملش وفي ناس نص نص

كل شئ قائم علي المجهود الذهني والذكاء

وهتكلم عن طرق البيع الاونلاين وكمان ازاي تجيب بضاعتك من الموردين

البيع الاونلاين ؛ Online selling : هي بيع المنتجات عن طريق مواقع التواصل الاجتماعي والمواقع المختلفة ويستعمل المواقع المختلفة كانها متجر لعرض منتجاته للزبائن

يعني أنت بتستغل الفيسبوك والانستجرام ومواقع زي Olx وغيرها لبيع منتجات للناس وتقابلهم او تبعتها شحن

هتكلم الاول عن الطرق وبعدين في الاخر هتكلم عن ازاي تبيع كل منتج وتسوقه فين وازاي يكون ليك عدد من العملاء كبير

في 3 طرق للبيع الاونلاين وطريقه اقتناء البضاعة من الموردين ( تجار الجمله اللي هيدوك باسعار اقل شوية عشان تعرف تحط نسبتك او مكسبك وتبيع )

1. أول طريقه وهي الوساطة بين التاجر وبين العميل او المستهلك

أنت مش معاك راس مال تشتغل بيه ، فبتروح لتاجر تعرفه وتقوله انا شغال علي النت وهجبلك عملاء كتير

هتديني بكام ؟

هيبدأ يقولك دي هوقفها عليك بكذا ودي بكذا

بتبدأ تصور الحاجات دي وتنزلها علي اختلاف المواقع وتبدأ تعرض اسعار حلوة وبتحط نسبتك او عمولتك

يبدأ المشتري يتصل بيك بتقوله موجود لون كذا وكذا بعدين بتتفق مع المشتري علي يوم التسليم والميعاد

بتروح للتاجر " ياما تدفعله فلوس من معاك وتاخد المنتج

او التاجر بيقولك طيب شوف الزبون وانت راجع حاسبني "

وبتقابل العميل العميل بالبضاعه ولازم تكون محسسه بالامان

اطلب انكم تتقابلوا في مكان عام مليان ناس ( مترو _ ميدان مشهور - قهوة مشهورة )

هيشتري هتاخد عمولتك وتسلم الباقي للتاجر ومع الوقت هتلاقي التاجر بيثق فيك اوي وهيعتمد عليك بشكل كبير

2 .الطريقه الثانية وهي الاقتناء

ممكن يكون معاك راس مال وليكن 10000 ج وهتشتري بيهم رفايع وليكن اكسسورات وبتبدء تصور بشكل جميل ومحترف

طبعا كل ما تشتري جمله كل ما الاسعار بتقل وكل ما التاجر يحب يتعامل معاك

في ناس بتتفق مع مصنع ملابس يطبع تيشرت بخامة معينة وعليه صورة معينة

طباعه التيشرت مش مكلفه ممكن في الاخر التيشرت يقف عليك ب 45 ج ( صيفي طبعا ) وممكن ازيد طبعا وكله حسب الخامة

في ناس بتبدء تشتري جزم كلاسيك مصنوعه بشكل جيد ويبدء يعرضها

كل ما تبيع في الاشياء اللي مش كتيرة في السوق كل ما فرص بيعك تكتر

وخصوصا المنتجات اللي تعتبر من الاساسيات

الجزمة أساسي لكن الساعة مش اساسي

مش هينفع يمشي من غير الجزمه لكن ممكن يمشي من غير ساعة عادي

القميص اساسي لكن البدي اللي تحت القميص مش اساسي

الشراب اساسي لكن الكاب مش اساسي

البنطلون اساسي لكن الشورت مش اساسي

ليه بقول كده ، عشان معظم بياعين الاونلاين بيبعوا الرفايع زي المحفظة والحظاظات والساعات وقليل جدا اللي بيبع الاساسيات اللي اساسا الانسان ميعرفش يمشي من غيرها

في بنات بتبدء تعمل اكل وتبيعه ودايما بتعتمد علي العزومات وتبدء تصور اكلها وتنشره

الطريقه الثالثة وهي علي حسب الطلب

مبيشتغلش في منتج او اثنين لا علي حسب طلب العميل بيطلب منه شئ معين

بيقوله موجود ولكن هرجعلك كمان شوية

وبيكون عنده خلفيه عن الاسعار عموما ويبدء يتصل بالتجار

ويتصل بالعميل تاني يقوله السعر وعليه 10 جنيه مثلاً

هو مش شغال في منتج او نوعية معينة من المنتجات ولتكن ملابس لا شغال ملابس ومكياج وانواع قهوة وبدل وكرفتات ومفروشات واي حاجه تخطر علي بالك

بييدء يعرض صور كتيرة لمنتجات كتيرة وهي في الاساس ميعرفش هيجيبها منين لكن وقت لما يجيلك request بيبدء يشتغل علية ويجبلك افضل سعر

طيب دي الطرق اللي ممكن الاونلاين يشتغل بيها لنيجي بقا ل ازاي يبيع وادوات البيع نفسها

ادوات البيع ؛

1.عندك طريقتين يا اما تبدء تعلن علي اكونتك الشخصي أو تعملك صفحة وتدعوا الناس ليها وتبدء تعرض شغلك المصور وتنزله

2- لازم تكون بتعرف تصور واتعلم تكتب المحتوي علي الصورة بشكل مفصل شوية

يعني لو ملابس ، اكتب يلبس اللي كام كيلو من كام لكام

ودا بيدي توسيع للعملاء لو كتبت M والعميل عارف انه يلبس Large

مش هيتصل بيك

لكن في M بتلبيس Large لانها مصانع والمقاسات مش دايما مظبوطة

فالافضل ليك تقول يلبس من 60 كيلو ل 70 كيلو واسالي التاجر ولو ميعرفش

ادخل اتعلم دا من النت واعرف كل مقاس بيلبس من كام لكام

واكتب السعر ومفيش حاجة اسمها انبوكس

انت بتدي انطباع للناس قبل ما تسال انه كده غالي

فأول ما تقوله 100 ج هيقولك غالي لان التخزين في دماغه أن ممكن السعر غالي ودي تبع علم النفس ان المخ بيخزن احساس معين وحتي لو السعر رخيص المخ هيقولك انه غالي عشان الاحساس

انت فاهمني طيب ؟ ما علينا عزيزي المشاهد

اكتب طريق الاستلام ومواعيد التسليم وحدد طريقة ما ولتكن المترو او اي مكان معروف في بلدك او مدينتك

3- بتبدء تعرف اصحابك وأهلك انك شغال في منتج ما اونلاين

في الاول شوية تريقه لكن مع اعتياد الامر واول بيعه ويبدء شغلك يبان هتلاقي كل الناس معاك اللي بيسالك اللي بيطلب منك

4- حدد رقم تليفون مش شخصي ويكون عليه واتس للاستفسارات وصور ومفيش حاجه اسمها المعاينه علي الطبيعة لانه من حقه تعجبه الاول ويعدين يجي يشوفها ويحاسبك عليها

ورقم التليفون ده !

عشان تقدر تعرف عملائك من عليه ، لان الرد علي العملاء الاونلاين غير اصحابك وتليفونك الشخصي

عميل الاونلاين بيكون متخوف وقلقان لو لقي طريقك معاه

ايوة مين

اؤمرني

انت عايز مين

هيقفل لانه اصلا مقلق

عكس لما تعرف ان دا عميل وتقول السلام عليكم مع حضرتك احمد ذكي للبيع الاونلاين ، اتفضل

هنا ممكن تقلب خوف العميل لانه عارف انه بيتعامل مع تاجر محترف ولكن اونلاين

بلاش جو يا صاحبي واشطا يا حبببي وتنورني في البيت دا

علي خير الله يا فندم وتمام علي ميعادنا وشوف حضرتك تحب تستلم فين ومفيش مشكلة

5- اشترك في كل الجروبات الاونلاين وكمان حاول تشترك في الجروبات اللي ينفع تعرض بيها منتجاتك

بلاش تعمل اكونت جديد شكله جديد لان العميل بيكون اصلا مقلق وخايف من الناس الاونلاين

طبعا وخصوصا البنات لما تعملي اكونت جديد احنا علي طول كرجاله بنشوفه راجل وعامل اكونت بنت فبنتلاشي نشتري منه وبنقول عليه نصاب وعامل اكونت بنت

يا ما تسوق باكونتك الشخصي اللي عليه صورتك او انك تعمل صفحة باسم مميز يدل علي محتواها

طيب اية اخطاء البيع الاونلاين اللي ممكن تعملها

1. اولها انك تعرض صور High resolution للمنتجات ، ايوة للاسف عرضك للصور عالية الجودة بيدي انطباع للعميل انها اصلية ويجي يشوفها يلاقي في اختلاف عن الحقيقة فهيترجم دا انك بتعلن عن شئ وبتبيع حاجه تانيه

ودي معظم المشاكل اللي بتقابل الناس اللي بتشتري اونلاين انها مش نفس الصور

2. اسعارك الغالية ليس دليل علي جوده منتجك واسعارك الرخيصة لا تجذب الا عملاء السعر

عميل السعر هو عميل المره الواحده ، اول ما يلاقي جنيه اقل عنك هيروح يشتري من هناك

البيع الاونلاين بيعتمد لفظياً علي جمله ( تربية الزبون ) انت بتربي وبتكبر زباينك يعني لازم تستهدف ان العميل يشتري منك مره او اتنين

وحتي لو مشتراش يرشحك لغيره

اعتمد في اسعارك علي الوسطية ، مش لازم كل المنتجات تكسب منها

في منتج بيشيل منتج

يعني هتبيع جزمه وشراب

مش لازم تكسب في الشراب طالما كسبان في الجزمة

دا بيشيل دا

3. من حقك تحط نسبه الربح اللي علي مزاجك بس السوق له مؤشرات سعرية محددة

نسبه الربح بتكون من 1 الي 30 % علي حسب المنتج ودي نسبه المتعارف عليها في السوق وطبعا في ناس بتحط اعلي من 100 %

بل بتوع السيراميك مثلا بيحطوا 300 % للاسف ويعملك خصم 70 % من 300 % وانت فرحان

4. مكان التسليم هو من أكثر الاخطاء الشائعة في البيع الاونلاين

كلامي موجة للبنات ، اتفاقك علي شارع او ميدان او طريق خطا ليكي

الافضل انك تبيعي من خلال سور او حاجز زي المترو او موقف سيارات

وأضمن حل للقاهرة والجيزة المترو

مش مطمنه خدي حد من اهلك ويقف بعيد عنك ميقفش معاكي او جمبك عشان ميقلقش العميل ، لان خوفه من انك جايبه حد معاكي يقلق

لان عمليات النصب بتكون طعم الصيد بتكون بنت فبلاش تحسي عميلك انه كان ممكن يتعرض عملية سطو

هحكي موقف لشاب ركب جمبي المواصلات وسالني علي مدينه احنا رايحنها ورايح يشتري كاميرا تصوير فوق 4000 ج مستعمله وخايف جدا

فقولتله اقف في المحطه نفسها ، متروحش تشرب شاي معاه علي القهوة ، ميقولكش تعالي معايا هنقعد في البيت وخلافه وطمنته

وللاسف لما نزلنا الموقف وجدنا ثلاث شباب بكلب اسود شرس في انتظاره ووقفت معاه لحد ما اتم البيعه وخد حاجته ومشي

دا غير انه حكالي انه اتعرض لموقف تثبيت في منطقه 15 مايو حلوان من فتره

اهتم جدا بمكان التسليم ويكون امان ليك وامان للمشتري عشان يحس بالامان منك

5. الفلوس

لما تسلم المنتجات وتاخد فلوسك

امشي عكس اتجاه العربيات ، متخليش العربيات في ضهرك

خلي العربيات في وشك ، لان حتي لو في احتماليه ان موتسيكل مستنيك هيبقي صعب جدا بمشي وراك لانه هيمشي عكس العربيات

وانت بتبيع والدنيا امان واستلمت فلوسك ، عدي الطريق علي طول للناحية التانية

هحكي طريقه سرقه عملاء البنوك ، اوعي تكون مفكر انه بيستناك بموتسكيل ويجري يخطف منك الشنطه لا الموضوع اتطور

بيكونوا خلية اجرامية ومجهزة 2 تاكسي الي 3 تاكسي

يعدوا من قدامك وانت توقف واحد فيهم بطريقه الصدفه البحته وانت مفكر انك مامن نفسك فتطلع من البنك تركب تاكسي علي طول

الامن ليك انك تعدي الطريق وتركب من الاتجاه التاني المقابل للبنك

حتي لو معاك سيارة اركنها الناحية التانية من البنك مش نفس صف البنك

اللي مستنيك راكن في نفس صف البنك ، لو عديت الطريق وخدت الطريق عكس البنك ، فالتاني صعب جدا يلحق بيك

انا ذكرت طريقه سرقه البنوك من باب انك لو اضطريت تقابل في مكان عام او شارع تاخد احتياطك

لان السرقه ليس الفلوس اللي معاك ، لا ممكن الموبيل بتاعك او البضاعه وغيرها

طيب تبدء ازاي ؟

هدي مثل بانك تبيع موبايلات اونلاين

. التاجر غالبا يكون صاحب لك ، بتروح تتكلم معاه انا هشتغل اونلاين

. بتتفق معاه علي السعر والتصوير واخذ المعلومات والبيانات

. بتنشأ صفحه علب الفيس بوك وتسمي اسم حلو وبلاش ( المحروسة للتجارة و_ مفروشات ام كنزي _ ساعتك ببلاش _ البس واتشيك)

انصحك انك تختار اسم يمكن ان يكون براند سهل النطق ويجي في العقل علي طول

في محل اسمه سمسم بتاع هدايا ، الاسم خفيف جدا لدرجه ان معظم البنات بتحبه واسمه ملوش علاقه بالهدايا لكن الاسم خفيف وسلس

اختار اسم بالعربي يكون خفيف او يكون بالانجليزي ولكن له معني

بتبدء تشتغ عليها وتعمل عليها دعوات للاصدقاء وتشيرها في معظم الجروبات ، اهتم ان صفحتك تبقي عليها عدد ومهتمين باللي بتقدمه

في دراسة عام 2018 قريتها ان 65% من عمليات البيع والشراء الاونلاين بتم من خلال بنات

اي حاجه بتدخل فيها جنس الاناث بصفه عامه بتنجح ، عشان لا وراهم شقه يشتروها او عربيه يجبوها ولا احلام بيحققوها ففلوسهم بيشتروا بيها اي حاجه محتاجينها ويا عيني علي الشباب والرجاله المطحونين

.لو معاك 500 ج بعد ما تتفق مع التاجر وتصور المنتجات وتسعر وتحط نسبتك

اعمل بيهم اعلان ممول 500 ج ودا مبلغ مناسب جدا تعمل بيهم اعلان في البداية

ومتنساش هدفك مش بس البيع لا وكمان الانتشار وتربيه العميل

. طبعا موقع OlX من المواقع المهمه جدا في البيع الاونلاين وتقدر تعتمد عليه بشكل كبير واعرف محل موبايلات جايب 10 يقعدوا يعلنوا علي اولكس ويهتموا بيه وبيعمل ارقام من خلاله

في كل الاحوال ، دا مصدر اضافي وليس اساسي عشان اكون صادق بشكل كبير

مناسب جدا للسيدات اللي حاسين بملل او صعب جدا يشتغلوا

مناسب جدا للطلبه وانهم يقدر يتمرن انه يشتغل حر ومن وهو صغير

مناسب جدا ليك انت كشاب او راجل مكتمل الأهليه انك تعتمد عليه كمصدر اضافي الي حين ان يحصلك لك استقرار بيعي كل يوم وساعتها تقدر تعتمد عليه كدخل اساسي

طيب اية المنتجات اللي ممكن تبيعها اونلاين وتمشي في مصر بشكل كبير

1. الملابس بكل انواعها سيدات ورجاله

2. الاكسسورات لكل انواعها سيدات ورجاله

3. البرفانات والمحافظ والميدليات

4. المفروشات والرفائع للعروسه

5. منتجات هدايا الامهات والمخطوبين

6. الموبايلات واكسسوراتها وخصوصا الجرابات

7. الدبل والخواتم للرجالة

8. الجزم الكلاسيك والكوتشيات التقليد والهاي كوبي

9. شغل الهاند مبد بكل انواعه

في النهاية ، ربنا يوفقكم ويكرمكم وعودا نفسكم دايما علي البيع اونلاين دي احلي طرق اقتناء وكسب المال العشر اللي اتكلمت فيهم في بوست قبل كده