مبدأيا كدا الكلية في مدينة فايد بالإسماعيلية
طريقة الوصول هتركب المترو من المحطة للمرج الجديدة دي آخر محطة للمترو هتنزل هناك وهتطلع برا محطة المترو هتلاقى قدامك عربيات بتودي فايد وعربيات بتودي الكلية ،، اركب العربيات اللي بتودي الكلية هينزلك علي مدخل الكلية
،، حاول توصل بدري
تقريبا معاك مهلة للساعة ٢ الظهر بعد الساعة ٢ اللي بيجي متأخر بيتحاسب واللي بيتأخر عن التاريخ اللي متحددله وبيروح في يوم تاني بيتحاسب ،، ألتزم بمواعيدك
وهناك بقي هيبدأ التفتيش وهتبدأ حياتك الميري
متخدش معاك أي حاجة ، تاني !! متخدش معاك أي حاجة (غير اللبس اللي انت رايح بيه وغيرات داخلية يفضل أطقم داخلية ابيض ،، وخد فرشين في الكوتش اللي لابسه هتحتاجهم للبيادة وكوتش اللياقة )
غير كدا أي حاجة تاني هتخدها فالنار مصيرها ،، زي أدوات النظافة شفرات الحلاقة القصفات والمعجون ومساحيق الغسيل والصابون ... الخ
وزي اللبس الملكي مش هتخش غير بالأنتا لابسه يعني متخدش في أيدك أي حاجة زيادة لا شراب ولا تيشرت ولا بنطلون ولا أي حاجة
وزي الأكل متخدش غير اللي يقضيك لحد باب الكلية لأني مفيش حاجة هتخش
ولتالت مرة هتاخد أي حاجة غير اللي لابسه والأطقم الداخلية ،، هيتولع فيه قدام عينك .
لو أنت مصريفك خفيفه وما بتصرفش متخدش معاك أقل من 2000 جنية ،، ولو أيدك فرطة وبتصرف خد المبلغ اللي انت عايزه بس خلي بالك من فلوسك
أول ما هتوصل هناك هتلاقي الشرطة العسكرية واقفة علي أول الطريق وبتشاورلك علي بوابة الدخول
هتخش من البوابة هتتفتش ذاتي من صف ظباط وظباط بعد كدا لو معاك كيس أو شنطة هتتفتش ولو في حاجة مخالفة هتتاخد منك
هتخش علي عساكر الأمن وهتتفتش تاني نفس التفتيش
هتخشوا مكان كدا في الاستاد هتقيس سترة افارول وترنج اللياقة وكوتشي اللياقة والبيادة هتتاخد مقاساتك وهتتكتب في ورقة هتبقي معاك
هيقعدوكوا مجموعات وهتيجي اتوبيسات هدخلكم جوا الكلية
هتروح للمسجل وهتعرف رقمك العام والسرية اللي انت فيها ،، هتملي شوية بيانات وبعدا كدا هتبدأ تتحرك لإستلام المهمات بعد كدا هتتحرك علي اماكن المبيت هتستلم شنطة فيها معظم اللي هتحتاجة ( شفرات معجون إبرة وخيط ملابس داخليه ملايات كسوة مخدة وهتلاقي ادوات شخصية كتير )
هتتحرك علي العنبر اللي هتنام فيه وهتعرف سريرك ودولابك
هتنام وهيبدأ يومك من الساعة ٤,٥
هتنزل ٥ص طابور لياقة بالترنج وكوتشي اللياقة هيخلص ٧
هتخلص وهتتحرك علي العماير هتشطف ،، وهتشد افارول
هتنزل طابور الفطار الساعة ٨
الفطار (زبادي مربة جبنة سلطة فول ورغيف عيش)
هتخلص فطار وهتتحرك علي أرض الطابور لطابور التفتيش الساعة ٩ (التفتيش علي هيئة الزي وحلاقة الذقن والشعر ) احلق زيرو قبل متروح
هيخلص طابور التفتيش وهيبدأ تعليم أولي علي شدة السرير والدولاب ، صفا وانتباه أداء التحية الخطوة المعتادة الدورانات وهيحفظوكوا شعارات للسرية هتقولها طول منتا بتتحرك في الكلية
الساعة ٢ الغدا ( لحمة او فراخ ، رز أو مكرونة ، خضار ، سلطة ، فاكهه ، رغيف عيش)
هتخلص غدا وتتحرك علي أرض الطابور لطابور الأعمال الإدارية (الراحة) بتاخد من ساعة ونص لساعتين راحة
بتنزل الساعة ٥ طابور الهتاف بعدها علطول فترة تدريبية مسائية بتخلص الساعة ٧ م
الساعة ٨ م طابور العشا بتتحرك للميس تتعشي (عدس مربة جبنة رغيف عيش )
هتتحرك بعد كدا علي المبيت هتغير الأفارول وهتلبس البجامة
معاد النوم الساعة ٩,٥ وهتصحي تاني يوم الساعة ٤,٥
وهتفضل في الدوامة دي مدة لا تقل تقريباً عن ٤٥ يوم .. (احنا خدنا ٥٤ يوم) فترة مستجدين
آخر الفترة دي هيتعملكوا حفلة وهتنزلوا بعدها بيوم إجازة في حدود ١٠ أيام ( دي فترة الإعداد )
بعد متخلصها هقولك هتعمل أيه الفترة اللي بعد المستجدين
عايز انصحك بس مش عارف أقولك أيه
لأن احنا الدفعة اللي لا اعرفنا نستفاد من اللي قبلينا ولا عارفين ندي نصيحة للبعدينا
بسبب الظروف اللي مرينا بيها
في كافتريا بتبيع حاجات كتير ( عصاير مخبوزات بسكوت شيبسي حاجات كتير بتتباع ) وفي تليفونات هناك لو عايز تكلم حد
بس متخليش رجلك تاخد علي الكفاتريا هتصرف ياما
مصحف ومصلية هيسمحولك بيهم
بس النوته والكشاكيل في ناس هدخلك وفي ناس هتخدها منك ترميها
بالنسبة للشنطة متخدش شنطة معاك ملهاش لازمة
لأنك مش هتاخد غير غيراتك الداخلية والمصحف والمصلية بس وخد كمان قفلين كمبيوتر معاك
خدهم في كيس أحسن لأنك لو خدت شنطة هيخليك تسلمها في أول زيارة ( تقريباً هيبقي ليك زيارتين خلال فترة المستجدين)
ولو مفيش حد جيلك هيخليك تروحها معاك في أول اجازة
وهيبقي معاك الشنطة اللي هتستلمها هتبقي شيلة عليك ،، فبلاش
بالنسبة لوثيقة التعارف
هتكتب فيها كل البيانات الخاصة بيك وبالعيلة ،، حتي لو في حد متوفي ، هتكتب بياناته كاملة (اسمه وظيفته تاريخ ميلاده ..الخ) وهتكتب في الآخر بين قوسين (متوفي)
بالنسبة للوثيقة اللي معاك استكملها بالكامل وصورها نسختين خلي واحده في البيت وواحده في محفظتك والأصل اللي معاك
لأنك أول مهتروح هتملي تلت وثائق تاني زي اللي معاك وهتسلم اللي معاك
وخلال الفترة هيطلب منك معلومات وبيانات عن أهلك فخلي معاك نسخة عشان متسوحش
وبالنسبة للنسخة اللي في البيت هتعذها بعد متتخرج إن شاء الله في وثائق تعارف تاني هتتطلب منك
تعليقات
إرسال تعليق