حديقة الحرية واحده من اجمل حدائق القاهرة

 

اكتشفت إن الكمالية بتسرق من عمري كتير.

لما رفضت أخرج بالليل عشان يومي بالنهار مكنش حلو، ضيعت ع نفسي نص اليوم اللي كان ممكن يبسطني، مكنش لازم اليوم كله يكون (بيرفكت)

لما رفضت أهتم ببشرتي عشان بهتم بيها يوم آه ويوم لأ، كان ممكن المداومة ع اليوم آه ويوم لأ تفرق معايا، مكنش لازم روتيني يبقى (بيرفكت)

لما ضيعت اليوم من غير مذاكرة، ولقيت نفسي عندي طاقة بالليل أذاكر ساعتين، وقولت لأ من بكرة اليوم ضاع خلاص، مكنش لازم مذاكرتي تبقى (بيرفكت).

لما ابتديت يومي بطريقة غير صحية وبعدين فكرت أعمل حاجة صحية في وسط اليوم وقولت بعد إيه، ما كدة كدة جسمي باظ، مكنش لازم كل أكلي يبقى (بيرفكت)

لما زعلت حد من صحابي، وبعدين فكرت أراضيه، بس قولت بعد إيه بقا، ما عمره ما هينسى، مكنش لازم علاقتنا ترجع (بيرفكت)

لما كان في إيدي أذاكر نص الدرس بس، وأنا قولت لأ يا الدرس كله يا بلاش، مكنش لازم معلوماتي تبقى (بيرفكت)

كام مرة ضيعت حاجات عشان في حاجات تانية ضاعت مني، وكام مرة رفضت أصلح المتبقي من اليوم عشان بوظت أغلبه، وكام مرة استنيت الوقت المثالي، واليوم المثالي، والمود المثالي عشان أعمل حاجة، والحاجات المثالية دي عمرها ما جت.

عشان اكتشفت إني ضيعت فرص كتير بانتظار الحياة اللي مفيهاش نقص ولا ينفع يكون فيها غلطة، قررت مكونش بعد إنهاردة كدة.

ساعتين في كل يوم مذاكرة في صفحتين أحسن من يوم كامل بذاكر منهج وبقية الأسبوع لأ.

تفاحة بعد ٥٠ فنجان قهوة أحسن من فنجان قهوة من غير تفاحة.

٣ دقايق بضحك بعد يوم مليان زعل أحسن من يوم تحفة بس بقية الأيام لأ.

الperfectionism شيء جميل وبيخليك حد متقن في عمله جدًا، لكن عمره ما هيخليك شخص منتج مستمتع بكل لحظة بحياته، هتلاقي نفسك فاكر اللحظات المثالية بس، اللي صدقني مش هتتكرر كتير في عمرك كله.