حديقة الحرية واحده من اجمل حدائق القاهرة

نقدم لكم اليوم شرح لعبه الفنتازى الدورى الانجليزى وقوانينها وكيفيه احتساب النقاط

اللعبة معتمدة علي الواقع والمباريات الحقيقية ودا بيخليك تتابع معظم مباريات الدوري الانجليزي إن مكانش كلها باهتمام كبير لأنك لما تختار لاعيبة معينة هتبقي مركز معاهم اكتر ومستنيهم يسجلوا أهداف أو يصنعوا اهداف او لو مدافع او حارس مرمي بتبقي مستنيه يخرج بشباك نظيفة (كلين شيت) واللعبة عبارة عن انك بتكون فريق بميزانية 100 مليون ... وكل لاعب له سعر معين حسب إمكانياته يعني مثلا صلاح اغلي لاعب لانه بيجيب نقط عالية وكذلك ديبروين وكذلك هاري كين وبرونو فيرنانديز

ف تختار 15 لاعب ب 100 مليون

2 حراس مرمي و5 مدافعين و5 وسط ملعب و 3 مهاجمين

بشرط متجبش اكتر من 3 لاعيبة من نفس الفريق

وتلعب ب 11 لاعب أساسي من ال 15 واربعة يبقوا دكة ولو في حد من التشكيل الاساسي ملعبش ينزلك حد من الدكة مكانه

الخطط المتاحة

اقل عدد مدافعين ممكن تلعب بيه 3 مدافعين واقل عدد لاعيبة وسط ملعب ممكن تلعب بيهم 2 واقل عدد مهاجمين مهاجم واحد .. فبالتالي ممكن تلعب بالخطط دي 3-5-2 او 3-4-3 او 4-4-2 او 4-5-1 او 4-3-3 او 5-4-1 او 5-2-3

التشكيل الاساسي والدكة

النقط اللي بتتحسب هي نقاط اللاعبين الأساسين اما ال 4 لاعيبة اللي هتحطهم دكة مش هتتحسب نقطهم في مجموع نقاطك الا لو لاعب من التشكيل الاساسي مشاركش خالص في المبارة فينزلك حد من الدكة لكن دا بشرط ان لاعب التشكيل الاساسي ميكونش شارك حتي لمدة دقيقة في المبارة لانه لو حصل كدا هياخد نقطة مشاركة ومش هينزلك حد من علي الدكة

والدكة ليها ترتيب أولهم الحارس البديل بعده 3 لاعبين مرقمين كالتالي 1 و 2 و 3 .. فلو الحارس الأساسي ملعبش ينزلك الحارس البديل لو كان لعب .. ولو لاعب ملعبش ينزلك رقم 1 من الدكة الا لو في حالة مثلا انك لاعب بثلاثة مدافعين واول واحد عالدكة مش مدافع فساعتها ينزلك اول مدافع من عالدكة سواء كان رقم 2 او 3 وكذلك لو لاعب ب 2 خط وسط بس في التشكيل الاساسي ومنهم واحد ملعبش فساعتها ينزلك اول لاعب خط وسط من عالدكة ولو لاعب بمهاجم وحيد وملعبش فينزلك اول مهاجم علي الدكة حتي لو ترتيبه مش رقم واحد ..

دا كله لان اقل عدد مدافعين ممكن اللعب بيه 3 واقل عدد وسط ملعب ممكن اللعب بيه 2 واقل عدد مهاجمين ممكن اللعب بيه هو مهاجم واحد

ولو 2 من التشكيل الأساسي ملعبوش ينزلك رقم 1 و 2 ولو 3 ملعبوش ينزلك ثلاثي الدكة كله

تغيير اللاعبين

اول مرة تفتح فيها اللعبة هيكون براحتك تعمل تغييرات زي ما انت عايز لحين وقت الديدلاين وهو وقت قبل بداية مباريات الجولة بساعة ونص .. لكن بعد كدا .. كل جولة ليك تغيير مجاني تمشي لاعب وتجيب غيره لو عايز لكن لو عملت تغييرات زيادة فكل تغيير زيادة عن التغيير المجاني بيسبب خصم 4 نقاط من مجموع نقاطك اللي حققته ولو عملت تغييرين زيادة عن التغيير المجاني يبقي ب -8 ولو 3 تغييرات يبقي ب -12 وهكذا ...

وخصم النقاط مبيبقاش لحظي وقت عمل تغيير زيادة .. لكن هيبقي مع بداية الجولة التالية ومع اول تحديث لسيرفرات اللعبة.

كيفية احتساب النقاط

اللاعب لمجرد مشاركته ل 60 دقيقة فيما فوق ياخد نقطتين ولو اقل من 60 دقيقة ياخد نقطة واحدة +

المدافع او الحارس لو خرج ب كلين شيت ومدخلش فيه اهداف ياخد 4 نقاط ولو جابوا جول ب 6 نقاط ..

وللعلم الشباك النظيفة (الكلين شيت) بيتم احتسابها بداية من الدقيقة 60 يعني لو عندك لاعب مثلا كان محقق شباك نظيفة وتم استبداله الدقيقة 61 او بعدها اللاعب هياخد نقاط الكلين شيت حتي لو الكلين بتاع فريقه ضاع بعد خروجه من الملعب مباشرةً

ولاعيبة الوسط الجول بتاعهم ب 5 نقاط ولو الفريق جاب كلين شيت ياخد نقطة

والمهاجمين الجول بتاعهم ب 4 نقاط وملهمش نقاط كلين شيت لو الفريق حقق كلين شيت

والأسيست (صناعة الهدف) ب 3 نقاط لاي لاعب سواء حارس او مدافع أو وسط ملعب او مهاجم

واللاعب اللي ياخد انذار بيتخصم منه نقطة -1 والطرد -3 والهدف العكسي -2 والحارس والمدافع كل ما يدخل في فريقهم جولين يتخصم منهم نقطة ولو دخل فيهم 4 جوال ب -2 ولو دخل فيهم 6 جوال ب -3 وهكذا

نقاط البونص

وفي حاجة اسمها نقاط بونص دي عبارة عن 3 نقاط او 2 أو 1 بياخدها اللاعب اللي كان مؤثر سواء سجل او عمل اسيست او مدافع جاب كلين شيت او صنع فرص كتير منها تحول لاهداف ومنها لا .. المهم البونص دا نظام معقد شوية يعني ساعات اللاعب اللي سجل مياخدش بونص لانه ضيع فرص كتيرة مثلا او اخد انذار دا بيقلل فرصته انه ياخد نقاط بونص ...

وغالبا النقاط بتبقي موزعة بحيث اللاعب الاكثر تاثيرا في المباراة 3 نقاط بونص اللاعب الذي يليه 2 نقطتين واللاعب الذي يليهم 1 نقطة .. ومش شرط يبقوا من فريق واحد او الفريق الفائز في المبارة ... فهي تقاس فقط حسب تاثير اللاعبين في المبارة

ونظام البونص بيكون الكتروني مش بعامل بشري وبيتضاف في نهاية اليوم الكروي وتعرفه بعد الماتش مباشرة من صفحات الفانتازي أو من مواقع معينة

الكبتنة

وفي حاجة اسمها كبتنة .. انك تختار كل جولة لاعب معين من تشكيلتك بحيث يكون هو الكابتن Captain ونقاطه تتضاعف يعني لو مثلا جاب 10 نقط تتضاعف تبقي 20 بالكبتنة

و في حاجة اسمها فايس كابتن دا لاعب تحط عليه الشارة البديلة Vice-Captain بحيث لو الكابتن الأساسي ملعبش تنتقل الشارة تلقائياً للكابتن البديل و نقاطه هو اللي تتضاعف وساعتها الكابتن الاساسي يخرج وينزلك لاعب من عالدكة ..

لكن لو الكابتن والفايس كابتن ملعبوش هتضيع عليك خاصية الكبتنة ومضاعفة النقاط

الديدلاين

دا وقت بيكون قبل بداية مباريات الجولة بساعة ونص وبعده متقدرش تغير حاجة لا تبديل لاعيبين ولا تغيير الكبتنة

مصطلح بلانك

بيتقال علي اللاعب لما ميحققش نقط وبرضو علي جولات هتتشرح تحت كمان شوية

الدوريات

انت بمجرد ما تعمل حساب هتدخل في دوريات عامة زي دوري كل لاعيبة الفانتازي علي مستوي العالم ودوري البلد اللي أنت مقيم فيها ودوري بي ان سبورت لو انت مقيم في الشرق الأوسط

وممكن تشترك في دوريات صغيرة بينك وبين صحابك عن طريق كود صاحبك اللي أنشا الدوري يبعتهولك وتدخله في اختيار join leagues في اللعبة وتنضم للدوري أو مثلا دوريات الصفحات المشهورة واليوتيوبرز بيبقوا ناشرين كود الدوري بتاعهم وتدخله في التطبيق وتنضم للدوريات دي .. وفي اي دوري من دول بيكون ليك ترتيب حسب مجموع نقاطك والترتيب دا بيزيد وبيقل حسب النقط بتاعتك كل جولة

الأسعار وبورصة اللاعبين

كل لاعب بيبقاله في البداية سعر معين حسب قيمته ومردوده الكروي المعروف عنه سابقا لكن اسعار اللاعبين مش هتفضل ثابتة طول الموسم و بتغيير حسب عمليات البيع والشراء .. يعني لو لاعب تألق والناس كلها راحت تجيبه بيعلي في السعر 0.1 مليون لكل زيادة والعكس لو لاعب مستواه تراجع والناس بدات تبيعه سعره هيقل 0.1 مليون لكل مرة نقصان سعر .. فانت لازم تتابع البيع والشراء عشان قيمة فريقك المالية تظل علي 100 م أو تزيد كمان عن ال 100 م ...

فلو لاعب معاك سعره زاد مرتين 0.1×2 يعني زاد 0.2 مليون قيمته عندك هتزيد 0.1 مليون ..

ولو لاعب سعره قل هتضر وهيقل عندك الا لو انت جبته مثلا ب 5 مليون وزاد بقي 5.1 وبعدها رخص بقي 5.0 فأنت مخسرتش فلوس لكن لو قل عن السعر اللي جايبه بيه يعني مثلا بقي 4.9 فسعره هيقل عندك وقيمة الفريق إجمالا هتقل ..

فمثلا انت جايب لاعب ب 5 مليون وزاد مرتين وبقي 5.2 وبالتالي قيمته عندك 5.1 ولو جه ورخص بعد كدا عن 5.2 وبقي ب 5.1 فسعره عندك هيقل ويبقي 5.0 بس لان الزيادة عندك مشروطة انه سعره يزيد عن ما انت جايبه ب 0.2 ولكل 0.2 زيادة انت هتزيد 0.1

يعني لو جبت لاعب ب 5.0 مليون وزاد اربع مرات وبقي 5.4 فسعره عندك يبقي 5.2 وهتستفيد من 0.2 دي لو بعته بعد كدا لانها هتضاف لقيمة الفريق الإجمالية

(لو مفهمتش نقطة تغيرات الاسعار دلوقتي مش مهم هتفهمها اكتر بعدين .. فعادي)

جولات الدبل وجولات البلانك

جولات الدبل دي جولات بيكون لبعض الفرق أو كل الفرق ماتشين في نفس الجولة واللاعب بتاعك بيتجمع عنده نقاط الماتشين علي بعض وبتكون بسبب ان بعض الفرق تأجلها ماتشات قبل كدا او تقدملها ماتشات بسبب مشاركتها في بطولات اخري غير الدوري او اي سبب كان .. فتيجي في جولة معينة يبقي عندها ماتشين في نفس الجولة .. ماتش أساسي وماتش كان متأجلها أو متقدملها .. ومش شرط يكون في دبل لكل الفرق مرات يكون لفريق واحد ومرات فريقين ومرات اكتر ومرات لمعظم الفرق والجولات دي بتكون مناسبة للخواص اللي هنشرحها تحت

جولات البلانك دي بيلعب فيها بعض الفرق بس والفرق التانية متلعبش بسبب ترحيل ماتشاتها لوقت تاني او الفرق اللي بتلعب في جولة البلانك لاعبة ماتش اقل من باقي الفرق فيلعبوه في جولة البلانك دي او اي سبب كان .. لكن المهم انه بيلعب فيها بعض الفرق يعني مثلا يلعب 10 فرق من ال 20 .. ودي انسب خاصية ليها الفري هيت اللي هنشرحها تحت

الخواص

الوايلد كارد

دي خاصية تقدر تغيير بيها تشكيلتك تماما وتعمل تغييرات براحتك دون خصم نقاط وتعملها لما تحس فريقك مش ماشي كويس ومبيجبش نقط او لما يكون عندك لاعيبة مصابة كتير او قبل جولة دبل ومعندكش لاعيبة كافية من الفرق اللي عندها دبل (ماتشين في نفس الجولة) اوقبل جولة بلانك وعايز تزود عدد اللاعيبة اللي هتلعب في جولة البلانك عندك .. ودي بتبقي متاحة مرتين في الموسم. .. مرة الدور الاول ومرة الدور الثاني

الفري هيت

نفس فكرة الوايلد كارد انك تغير فريقك بالكامل وتعمل تغييرات براحتك دون سوالب لكن لمدة جولة واحدة فقط وبعدها فريقك يرجع زي ما هو في الجولة التالية بنفس اللاعيبة اللي كانت معاك قبل تفعيل الفري هيت .. ودي خاصية مفيدة جدا في جولة البلانك اللي عدد الفرق اللي بتلعب فيها يكون قليل فتفعل الخاصية دي وتغير تشكيلتك وتجيب لاعيبة من الفرق اللي عندها ماتشات في جولة البلانك حتي لو لاعيبة مش حابب انها تكمل معاك بعد كدا لان كدا كدا الجولة اللي بعدها هترجع لتشكيلتك الأساسية وبرضو ممكن تستخدمها قبل جولة دبل بحيث تزود اللاعيبة اللي فريقك اللي عندهم دبل يعني ماتشين في نفس الجولة وممكن تستخدمها لو فريقك فجاة تصاب منه نص اللعيبة لكن دا نادر ويفضل استخدامها قبل جولات البلانك او الدبل .. وخاصية الفري هيت بتبقي متاحة مرة واحدة في الموسم

التربيل كابتن

دي خاصية تخلي الكابتن بتاعك بدل ما نقاطه تتضاعف فقط .. نقاطه تتضرب × 3 يعني لو جاب 10 نقط يبقوا 30 بالخاصية دي .. ودي متاحة مرة واحدة فقط في الموسم .. ويفضل استخدامها في جولات الدبل لان الاعب بيكون عنده ماتشين فلو معملش حاجة في ماتش ممكن يعمل في التاني فنسبة نجاح الخاصية بتزيد

البنش بوست

دي خاصية ان النقاط اللي بتجيبها اللاعيبة اللي علي الدكة عندك بتتحسب بالإضافة لنقاط التشكيل الاساسي

ودي يفضل استخدامها في جولات الدبل عشان تحقق اقصي استفادة بحيث تخلي لاعيبة تشكيلتك معظمها عندهم ماتشين .. الاساسيين والبدلاء .. بحيث اللي معملش في ماتش يعمل في التاني .. فنسبة نجاح الخاصية تزيد وتحقق اقصي عدد نقط ممكن .. ودي متاحة مرة واحدة في الموسم برضو