Haty Abu Hassan - حاتي أبو حسن
كفتة من عالسيخ سخنه تتسحب في رغيف عيش مشوي عالفحم و ب ١٥ جنيه
من قلب منطقة مصر الجديدة و المباني الجميلة بتاعت زمان، هتلاقى محل اسمه "ابو حسن" تحس انه بقاله في المكان دا سنين طويلة من كتر ما الناس واقفين عليه مع انه لسه جديد
و واضح فعلا من الصنعة إن أبو حسن قديم و خبرة في المشويات، راجل مش سهل خالص و عارف كويس اوي بيعمل ايه
تعالى كدة نركز مع بعض في رغيف الكفتة ابو ١٥ جنيه دا
صباع الكفتة بينزل من عالسيخ ملهلب في قلب رغيف عيش بلدي و يشرب من طعم عصارة الكفتة و فيه الرغيف نفسه بيبقى فيه سنة القرمشة اللي كلنا بنحبها دي .. على اد ما هي حاجة بسيطة اوي بس قادرة انها تسعدك سعادة متتخيلهاش ويا سلام لو معاها كوباية مياة سلطة
تعلالي بقى كدة و ركز معايا في الاختراع التاني "طاجن السجق بالبهاريز" الطاجن بيبقى مليان سجق سجق سجق مع ميكس بهاريز "بصل و طماطم و مكونات تاني كتير" مع خلطة توابل و بهارات و قطع بطاطس مكعبات .. البطاطس دي بقى بتبقى شاربة من طعم الميكس دا كله و نااااعمة زي الزبدة
حقيقي لو اي حد اكيل من الناس اللي بتفهم في الاكل هيدمن الطاجن دا من جماله
الطرب بيعملوه كور كدة عشان تاخدهم واحدة واحدة كدة على بؤ واحد و هو لسة سخن و تبلع بمياة السلطة "الويسكي"
الفراخ المشوية كمان عندهم حلوة اوي بس اللي عجبنا اكتر الشيش طاووق، من طعمها تعرف انها واخدة حقها في التتبيلة و الفراخ طرية و في نفس الوقت مستوية كويس
لما تروح هناك اعمل حسابك انك تطلب ورق عنب و ممبار "لازم تطلب ممبار" بيعملوه متحبش تحبيشة حرشة نادرا ما الواحد يلاقي حاجة بالحلاوة دي
طبعاً الاكلة دي محتاجة جنبها "الويسكي" اللي هي مياة السلطة، و بيعملو كمان سلطة اختراع كدة بالفلفل و الطماطم و المسطردة لايقة اوي مع الاكلة دي
القعدة هناك عبارة عن كام طرابيزة قصاد المحل و الموضوع بسيط اوي
رقمهم
01550303973
العنوان
29 ميدان صلاح الدين، بجوار فرع المصرية للاتصالات WE مصر الجديدة
تعليقات
إرسال تعليق