مبدئيا رأيي الشخصي ان لبنان من أحلى الدول اللي لازم يتعملها سياحة عالأقل مرة ف العُمر و ده لأن طبيعتها جميلة جدااا و فيها اماكن سياحيه كتير وفنادق وحدائق وشواطئ جميله .
لبنان ف الوقت الحالي العملة فيها مُنهارة بمعنى الكلمة و أظن ده ممكن يكون افضل وقت لينا كمصريين اننا نعمل سياحة هناك بتكلفة معقولة و ليهم كمساعدة للدولة ان يبقى في سياحة عندهم
انا حجزت كل حاجة مع نفسي ( طيران وفندق ) و عملت pcr و طلعت ع هناك محدش سألني عن الدولارات اللي معايا أد ايه لكن اتسألت نازل فين و مدة أد ايه ( بيدوني عالباسبور طابع ب ٢٢ دولار لمدة ١٥ يوم ) (ولكن أنصح ان اللي يسافر يلتزم ب ٢٠٠٠٠ دولار لأن وارد تصادف ان هناك يطلبوا يشوفوهم ) و بعد كده بيعملوا لنا pcr ف المطار سعره المفروض انه بيكون متحمل على سعر تذكرة الطيران يعني مابتدفعش حاجة عليه هناك
اول غلطة ف السفرية اني مابعتش للفندق اسأله التكلفة اد ايه من المطار لعنده و طبعا ذكائي ده خلاني لما خرجت من المطار و اول سواق قابلني قلتله عالفندق قال لي عارفه قلتله كام قال لي هما هون بياخدوا ٣٥ دولار انا باخد منك ٢٥ بس طبعا استنصحت و قلتله لا طبعا هما ١٥ بس قال لي واللا لأني حبيتك ما بقولك لا و أتاري اللي حبني ده معلم عليا ف ١٣ دولار و المشوار هو ٢ دولار بس ( ٢٥٠٠٠ ليره ) وده طبعا اللي انا عرفته بعد اسبوع هناك تعامل مع التاكسيات و ده فعلا اللي دفعته ونا راجع المطار للسفر لمصر
النقطة التانية اني حجزت الفندق من على بوكينج و كان سعره وقتها المدة كلها ب ١٣٨ دولار و لما روحت عرفت صدفة من الفندق ان الليلة بتبدأ من ٢٠٠٠٠٠ ليرة يعني حوالي ١٥ دولار يعني لو حجزت تبعه كان هيقف عليه المدة كلها بحولي ٩٥ دولار و ده كان تاني بوكس آخده ونا هناك
لو هتعمل رحلات شوف تاكسي يوصلك للمكان واتفق معه يستناك ويرجعك للفندق و لو الليلة دي كلها ف محيط بيروت مش هتعدي ال ١٨٠٠٠٠ ليرة يوم كامل و لو مثلا صيدا او مكان تاني بعيد شوية ممكن تبقى ٢٥٠٠٠٠ ليرة ( يعني ٢٠ دولار ) من ١٠ ص ل ٧ بالليل
بالنسبة للأكل انا كنت تقريبا باكل شاورما او مشاوي ولما جربت سمك ف يوم كان غالي ومش حلو بس ممكن اكون انا اللي ماوفقتش فيه لأن في اماكن هما شكروا جدا فيها
المزارات طبعا حريصا وجعيتا وجونيه و بيت الدين و نهر ابراهيم و الشوف و قلعة موسى و محمية الأرز و عملت باراليدنج بس كلهم تحفة ماعدا قلعة موسى ملهاش اي ٣ لزمة و غالية عالفاضي انما الحاجات التانية تعتبر ببلاش ولكن الباراليدينج كان ب ٤٠٠٠٠٠ و ده اللي الله يباركله واحد مصري قابلته ف الفندق دلني عالمكان بعد ما كان الفندق بيقول لي ب ٦٠٠٠٠٠ وطبعا جميل جدااا لكن لا انصح به اصحاب القلوب الضعيفة
بالنسبة ل pcr الرجوع ممكن الفندق يجيبلك مندوب يعمله لك ويجيب لك النتيجة ب ٢٠٠٠٠٠ للفرد .. ركبت مع سواق تاكسي شاب قال لي اوديك مستشفى رفيق الحريري الحكومي تعمله ب ٧٥٠٠٠ فقط و لما وداني هناك وخلصت خرجت مالقتوش بس الحمدلله ماكنتش اديتله فلوس و ده اللي في حد حظرني منه هناك ان الشباب السواقين مش مسئولين
ودى اهم الحاجات يخلوك تسافر لبنان في راس السنة
١- لبنان دلوقتي رخيصة جداً جداً ولو مرحتهاش دلوقت مش هتشوفها تاني ابداً
الاقامة فاليوم ممكن تبقى ب ١٠$ والاكل في اليوم باقل من كدة بكتير
٢- لبنان حلوة كدة روحها حلوة شعبها حلوة كلامهم حلو فهتتبسط حتى لو بس رحت اتكلمت مع اتنين لبنانيين ورجعت
٣- ساعة بالطيارة ومن غير فيزا والتذكرة بتبدا من ٤٤٠٠ جنية
٤- الاكل في لبنان حاجة كدة لا يمكن تتوصف. جمال بس حلاوة بس سواء كلت في مطعم رخيص او مطعم غالي
٥- ارخص paragliding في العالم دلوقت في لبنان بحوالي ٣٥$ بس
٦- البلد صغيرة بس كل حتة فيها حلوة ومختلفة الشمال غير بيروت غير الجنوب غير الجبال
والبلد كلها عالبحر المتوسط
٧- لبنان في الشتا تلج وشغل اوروبي تاني خالص
٨- الشوبنج فيها رخيص وخد معاك شنطتين عشان تجيب حاجات كتير
٩- اوعا تاخد معاك اكل ولا تونة ولا الكلام دة عشان اكل لبنان مينفعش يتعمل معاه كدة
١٠- افتكر اني قولتلك انك لو مروحتش لبنان دلوقتي هتندم كتيييييير
تعليقات
إرسال تعليق