حديقة الحرية واحده من اجمل حدائق القاهرة

 المكان اللى اسم على مسمى

المكان المثالى للأكيل اللى بيدور على اكله حرشة ترم العضم ..والمنيو اسعارة حلو اوى وشاملة الضريبة ( مع الصور )

يعنى تروح تاكل طاجن الرز المعمر اللى بالحمام ولا شوية ورق عنب بالكوارع حاجة من الحاجات اللى بتخش على تقوية العضم علطول .. والمكان دة على فكرة موجود من سنه ٢٠١٦ بس فى موقع غير دة

جربت كولا بالفلفل الحار ؟؟

طيب جربت حلاوة طحينية بالايس كريم ؟؟

طيب ركز فى اللى جاى بقى

خلينا نتكلم الاول عن المكان وقعدة وديكوراته اللى هى مزبج ما بين ديكورات النوبة وديكورات الدوار الفلاحى والاهم ان عندهم تراس كبير الفيو بتاعه تحفة اكنك قاعد قدام قصر من قصور باريس والزرع ( وبالاخص بليل مع الانوار )

حتى الاطباق اللى بيقدموا فيها الاكل الاطباق الصاج بتاعت زمان اللى كنا بنلاقيها فى بيت جدودنا

نصيحة مننا الطواجن اللى تختاروها شيروها مع بعض لاننا صعب نقول ان فى حاجة احلى من التانية

بس من الحاجات اللى مفيهاش خلاف هو الرز المعمر اللى بالحمام ودة تاكله من غير ما تفكر تخلط معاه اى حاجة لان هو نفسة حكاية

فى كمان طاجن ورق العنب اللى بالكوارع عجبنا اوى

و طاجن السجق مع الصوصات اللى نازلة من البصل والتحابيش بتاعته وسوى السجق اللى مش مهرى

المهم بقى مع الاكل دة كله لازم تسيب مساحة وتتصرف وتجرب الفطير بتاعهم ( الفطير الحادق بردو حكاية ) بس سيب مكان للفطيرة ام سكر ولبن مع كوباية الشاى

اه صحيح فى عندهم مشروب للكبار فقط ودة حضرتك بيجيبلك ازازة كولا عادية خالص بس فيها صوص سبايسى ومتقطع فيها شرايح فلفل مولع حاجة اختراع بس طعمها غريب وحلو اوى ( جربوها بس خليك حذر )

ومن الحلويات اللى غير تقليدية حاجة اسمها حلاوة زمان دى قطعة حلاوة طحينية عليها جيلاتى وايس كريم

اجمالا تجربة حلوة فى مكان شيك والقعدة ف التراس ميتزهقش منها

العنوان : ٥٢ شارع ابراهيم سالم - متفرع من صلاح سالم - امام البوابة الجانبية لدار القوات الجوية وقريب اوى من الميرغنى وكلية البنات

التليفون : 01100444479