حديقة الحرية واحده من اجمل حدائق القاهرة

صينية عليها حوالى كيلو وربع شاورما وتحتيها فتة بالتومية ب ٢٦٠ جنيه وتكفى ٥ افراد مستريح اوى

هو دا الراجل اللي مغرق ((شبرا )) كلها شاورما و مشويات

مبدئيا كدة المطعم عبارة عن عمارة كاملة ٣ ادوار، و كل ما تدخل تلاقي كتيبة شيفات كل واحد متخصص في قسم مختلف، شاورما، مشويات، طواجن، بيتزا، فطير، كريب .. و طبق الفتة ب ٢٠ جنيه

تطلع فوق تلاقي بقى صالة مكيفة و ديكورات شيك جدا و اخر دور فيه القعدة النوبي و كيدز اريا ببلاش

هيبدأ قلبك يدق اول ما تشوف الفراخ بتتشقلب عالسيخ في الشواية و بتعمل اغراء و جنبها سيخ الشاورما لونه و ريحته تجيبك من اول الشارع

نيجي بقى لصينية الشاورما اللي عاملة قلق جامد في شبرا دي، كل اللي جربها بيشكر فيها اوي وطلعت حكاااااية

دي عبارة عن جبل فتة شاورما متغطية بالكامل بشرايح الشاورما (حوالي كيلو و ربع) نص الكمية لحمة و النص التاني فراخ، مفيش فيها ربع فتفوتة فاضية و شكلها اصلا مغري جدا

تحت بقى في طبقة تومية كريمي من اللي قلبك يحبها و عليها العيش الشامي المقرمش و الرز البسمتي .. حاجة فوق العظمة بجد

بكام الصينية دي؟ ب 260 جنيه و تكفي 5 افراد .. يعني كل واحد حوالي 50 جنيه و هتاكل لحد اخر سنتي في كرشك

عندك كمان صينية المشاوي ريش، كباب، حمام، كفتة،طرب و شيش طاووق الاهم بقى إن رصة المشاوي نفسها يفتح النفس و طلبنا جنبها طاجن ملوخية، ممبار حرش و طاجن محاشي مشكلة بخلطة بيتي ١٠٠٪ مع شوية بصل بالتوابل و البهارات ملهمش حل الصينية دي ب ٧٠٠ جنيه

بعد الاكل بقى طلعنا عالقعدة النوبي عاملين الدور كله قعدات عربي عالارض مفروشة كليم بألوان مبهجة و شلت مريحة اوي و الطبلية في النص

طلبنا فطيرة "ست الحسن" فطيرة مشلتتة بالقشطة و العسل .. الفطيرة بتبقى لسة خارجة من الفرن و عاملة زي اللحاف تيجي تقطع منها حتة تسمع صوت القرمشة الجميل دا و قلبها طري، غمس يا معلم و دلع نفسك، بعدها على طول احبس ب براد الشاي بالنعناع و كدة عظمة اوي

رقمهم

15604

العنوان

تجربتنا كانت في فرع ترعة الشابوري في شبرا الخيمة - مسطرد

و ليهم فرعين كمان واحد عند كوبري عرابي و التاني عند برج طيبة بجوار محطة بنزين موبيل