تعرف ايه عن مشروع التجسس ريفين وعلاقته بالأمارات وايه دخل عملاء أمريكيين بالموضوع.
ديفيد ايفيندين.
قبل الحديث عن Project raven تعالوا نعرف مين هوا ديفيد.
ديفيد كان جندي في البحرية بس كان حابب يتعلم حاجة تفيدة ويشتغل بيها وهنا حس ان الCyber warfare شداه فقرر ان يتعلم سايبر سيكيوريتي وفعلا بدأ ياخد كورسات في الكلية وكمان بقي بيتعلم في البيت أي حاجة بيدرسها عن الاختراق. ديفيد كان شاطر وده اللي خلي وكالة الامن القومي NSA تعرض عليه وظيفة offensive intelligence analyst, ديفيد مسئول عن التحقيق في أي عمليات اختراق بتم من منظومات اجنبية ضد مؤسسات أمريكية.
ديفيد فضل شغال حوال 3 سنين مع NSA وقرر يخرج من الخدمة وجاله عرض انه يفضل مع NSA بس جاله عرض تاني
شركة CyberPoint
الشركة دي بتعرض خدمات الاختراق وهي من ضمن شركات مسموح ليها من الحكومة الامريكية بتنفيذ حاجات زي دي. هنا ديفيد اتعرض عليه يشتغل هاكر معاهم ويساعده في القضاء علي الإرهاب. طبعا ديفيد ميعرفش تفاصيل اكتر عن العرض إلا لما يمضي NDA او اتفاقية عدم الإفصاح. هنا ديفيد وافق خصوصا ان في فلوس كتير وهيساعد بلده يعني الكل كسبان.
ابوظبي والفيلا
ديفيد سافر هو ومراته لأبوظبي وفضلوا قاعدين في فندق حوالي 60 يوم. ديفيد اتاخد علي الفيلا اللي هيبتدي فيها شغل ودي في مكان معزول شوية وفيها موظفيين كتير ودي تعتبر حاجة مريبة بس ديفيد واخد علي الكلام ده.
الملف البنفسجي والملف الأسود.
ديفيد دخل اجتماع خد فيه ملف بنفسجي يحتوي علي معلومات عن شغله وهو الحماية زي مثلا شغل علي firewalls و Intrusion detection system واي حاجة خاصة بالحماية.
اول ما الاجتماع ده خلص, بدأ واحد تاني بيشرحوا فيه ان الاجتماع الأول ما هو إلا غطاء وان شغله هو العمل مع NISSA ودي وكالة اماراتية سرية زي NSA كده وشغله هو جمع معلومات عن اهداف واختراقها ودي برده حاجة مريبة بس بالنسبة لديفيد ده عادي لأن دي طبيعة شغله.
المشروع Raven.
بدأ ديفيد وزمايله الامريكان في عمليات اختراق لأهداف واضح انها إرهاب_ية التيم كان بيجيله هدف فبيبدأ في جمع المعلومات عن طريق السوشيال ميديا ووضع خطة لاختراق الهدف ده بدون مايعرف. اول مابيتم اختراق الهدف بيتم جمع كل المعلومات اللي يقدروا عليها زي صور, ايميلات, سجل مكالمات الخ الخ. طبعا عمليات الاختراق بينفذها اماراتيين مش ديفيد وزمايله. دور ديفيد هو تعليم الناس دي و توجيها اثناء عمليات الاختراق.
قطر وبداية الشك.
الموضوع بدأ يكبر وبدأ الهاكرز يستهدفوا حكومات بقي زي مثلا مهمة معرفة دور قطر في تمويل جماعة الاخ_وان وكمان الموضوع اتطور وبدأوا يطلبوا معلومات عن العيلة المالكة القطرية زي مواعيد رحلاتهم وحاجات كتير.
كمان بقي في مهمات ضد صحفيين و نشطاء إماراتيين وبدأ الموضوع يبقي سياسي وده اللي معجبش ديفيد خصوصا بعد ماجاله ايميلات تخص ميشيل اوباما وزيارتها للشرق الاوسط.
ديفيد هنا حس انه لازم يمشي وبالفعل في شركة تانيه جت استحوذت علي العملية وبعتتلهم اذا كانوا حابين يكملوا ولا لأ. هنا ديفيد قرر انه مايكملش.
شركة DarkMatter
بعد انهاء ProjectRaven بعض الامريكان فضلوا مع DarkMater وفضلوا يكملوا العلميات وهنا يجي دور Lori.
لوري ستراود.
لوري كانت زي ديفيد شغالة في NSA وراحت اشتغلت معاهم. لوري كانت في فريق التحليل وده الفريق اللي بياخد المعلومات اللي بيجبها فريق ديفيد ويحللها ويبعتها للإدارة.
لوري لاحظت اسامي أمريكية في الأهداف وفعلا اكتشفت انهم صحفيين امريكان. لوري اعترضت وبدأت تسأل أسئلة لحد ما DarkMatter اديتها إجازة وطلعوها برا المبني وفضلت شهرين لحد ماسمحوا ليها بالرجوع لأمريكا وأول ما وصلت الFBI حققوا معاها وسألوها اتجسست علي مين. بس هي خافت تجاوب.
التحقيقات الامريكية.
بدأت الFBI تحقق خصوصا بعد ما لوري ساعدتهم واكتشفوا ان في تلات امريكان اشتركوا في عمليات اختراق لصالح الامارات بدون التصاريح اللازمة من أمريكا واستخدامها ضد امريكان وده يعرضهم للمسألة القانونية. حصل اتفاق مابين وزارة العدل والتلات متهمين بدفع غرامة مليون و 600 الف دولار وعدم حصولهم علي تصاريح امنية تاني.
التلاتة كانوا بيقبضوا ملايين يعني الاتفاقية دي في صالحهم.
مين هما التلاتة وعملوا ايه بالضبط؟
مارك باير 49 سنة. ريان ادامز 34 و دانييل جريك 40 سنة. التلاتة اشتغلوا مع الحكومة الإماراتية من 2016 لحد 2019 ضمن مشروع ريفين واستخدموا وابتكروا أساليب اختراق لصالح حكومة الامارات.
عملوا برنامج Karma وده زي برنامج Pegasus الشهير.
برنامج Karma
ده برنامج او تكنولوجي بتستهدف هواتف ايفون عن طريق ثغرة في تطبيق imessage وبيتم الاختراق بدون تدخل الضحية يعني Zero click attack.
تم ترقيع الثغرة دي في 2016 بس نزل نسخة تانية في 2017 بس برده تم ترقيعها واصبح البرنامج ملوش لازمة.
احب اقولك ان الموضوع معروف من 2019 و اتنشر تحقيق في رويترز بس ديفيد أتكلم عنه في مؤتمر 2021 Black Hat.
ادوارد سنودن و ExpressVPN.
واحد من التلاتة وهو دانيل كريج ومنصبه CIO في شركة ExpressVPN. طلب سنودن من مستخدمي الخدمة انهم يسيبوها.
شركة ExpressVPN صرحت انها عارفة القصة دي وان دانييل قالهم عليها وانهم شايفين ان دي من الحاجات اللي خلتهم يعينوه وانه قدر يساعدهم علي حماية المستخدمين.
معلومة إضافية: شركة ExpressVPN اتباعت لشركة Cape في الأراضي المحتلة.
تصريحات DarkMatter
طبعا صرحت DarkMatter ان الكلام ده هُراء ومحصلش.
الكلام ده انا جايبه من مصادر أمريكية يعني الكلام ده كله ممكن ميكنش حقيقي هسيبلك المصادر كلها واحكم انت.
المصادر:
ده حديث مع ديفيد ونشطاء بيشرحوا اللي حصل وكلام كتير. انصحك تسمعه خصوصا لو مهتم بالسايبر سيكيوريتي تقدر تشوفه من هنا
تصريح سنودن اضغط هنا
خبر عن الهاكرز التلاتة اضغط هنا
تعليقات
إرسال تعليق