الجامعة في الأصل كانت جامعة خاصة تم انشائها سنه 2008 وقايمه علي فكرة التعليم الالكتروني قبل ما كان حد يعرفه اصلا وكانت الدوله بتدعمهم جدا لانهم بيدخلوا تكنولوجيا جديدة في قطاع التعليم قبل كورونا وقبل التوجه للاونلاين اصلا.
في سنة 2018 جه الرئيس عبدالفتاح السيسي وقرر يحول الجامعة دي من جامعة خاصة لجامعة أهلية والهدف زي ماهو مكتوب في موقعهم انهم يدخلوا خدمات تعليمية ذات كفاءه عالية للمحافظات البعيدة عن القاهرة ومافيهاش خدمات تعليمية كتير.
هتقولي يعني ايه اهليه يا سيدي اصبر هقولك:
اهلية يعيني هي ملك الدولة مش ملك حد و مالهاش اسهم ولا ليها ناس عايزه تكسب من وراها يعني بالبلدي كده هي مؤسسة مش هدفها الربح المصروفات اللي بياخدوها بيصرفوها تاني ع التعليم ماحدش بياخدها في جيبه بيديرها مجلس امناء بيتم تعيينه من الدولة تقريبا يعني
اللي قدرت اوصله ان نظام الجامعة 80% منه قايم علي المحاضرات الاونلاين والطلبة كانت بتنزل يومين بس تقريبا لمقرات الجامعة علشان تحضر السكاشن ( ايوه مقرات مش مقر اصبر هقولك ليه) وده قبل كورونا تقريبا بعد كورونا بقا كله اونلاين.
الجامعة فيها 3 كليات بس للاسف في الوقت الحالي بس ع موقعهم برضو بيقولوا انه مخطط يفتحوا كليات تانيه خلال السنين الجايه ف يا مسهل الحال يارب
- كلية ادارة أعمال اللي هي بنقول عليها تجارة يعني فيها 5 اقسام مهمين جدا لسوق العمل هما ( محاسبة - تمويل واستثمار - تجارة الكترونية - تسويق - نظم معلومات ادارية)
- كلية حاسبات ومعلومات ودي بيقولوا عليها كلية المستقبل.
- كلية دراسات عليا في التربية فيها دبلومات تربوية عامه وخاصه ومهنيه والكلام ده لو حد عايز يعمل دراسات عليا يعني
تنسيق الجامعة السنه اللي فاتت كان 60% لكلية ادارة أعمال و70% لكلية الحاسبات سواء علمي علوم او علمي رياضه ايوه لاقيت انهم بيقبلوا علمي علوم في حاسبات عادي جدا ( انت متخيل الجمدان ان كلية حاسبات بـ 70%) ! وبتقدر تقدم حتي لو عدي علي شهاده الثانوية بتاعتك 5 سنين.
الجامعة بتقبل الشهادات الثانوية وكل اللي بيعادلها سواء بقا ازهرية او عربية او اميركان او بريتش او جن ازرق وكمان بتاخد دبلوم التجاري وكانت بتاخد الصناعي بس ماعرفش وقف ليه
مصروفات الجامعة بقا السنة اللي فاتت كانت في رينج 12 لـ 14 ألف علي حسب المواد اللي بتتسجل وتقريباً عندهم فروع بيكون سعرها حنين شويه
نيجي للشهادة بقا اللي واكله دماغنا:
نظام الجامعة لاقيت انه قايم ع حاجة جميلة جدا وهي نظام الشراكه بينها وبين الجامعات الحكومية
يعني ايه بقا يا هندسه الكلام ده !
يعني الجامعة عاملة اتفاقيه مع الجامعة الحكومية علشان لما الطالب بتاعها يتخرج بياخد شهادة مختوم عليها ختمين ختم الجامعة الأهلية وختم الجامعة الحكومية يعني هتبقا خريج جامعتين
المهم ان الجامعات اللي فيه بينهم شراكة دي هما جامعات جامدة جداً وهما دلوقتي 9 جامعات وهما ( الأسكندرية - الفيوم - المنوفيه - السادات - جنوب الوادي - بني سويف - أسوان - سوهاج - قناه السويس) مش قولتلك جامعات جامدة !
طبعا مش هقول ان الشهاده معتمدة بره مصر عادي جدا وعلي صفحتهم لسه من شهرين تقريبا واخدين تصديق من الملحقية الثقافيه السعودية
نيجي للمهم بقا ان الجامعة ليها 12 مقر ! انت متخيل يا مؤمن ان لو انت في الصعيد مش محتاج تسكن مدينه جامعية علشان تدرس في القاهرة والجامعة تبقا جنب بيتك !
مقرات الجامعة موجودة في الأسكندرية والفيوم والمنوفية ومدينه السادات والأسماعلية وقنا والغردقة واسوان و سوهاح واسيوط كمان في القاهرة.
كل دول جوه الجامعة الحكومية يعني مثلا فرع القاهرة موجود في جامعة عين شمس فرع اسيوط موجود جوه جامعة اسيوط فرع الاسماعلية جوه جامعة قناه السويس يعني لو مالحقتش جامعة حكوميه طلعلهم لسانك وانت جوه وبتدرس في الحرم بتاعها
الجامعة مقرها الإداري في الدقي في 33 شارع المساحة والمفروض اصلا بيتبني ليها حرم جامعي في مدينه بدر ده عرفته من اخبار اخر اجتماع لمجلس الامنا بتاعهم مع وزير التعليم العالي من كام اسبوع
رأيي بقا لو هتاخد بيه يبشه:
الجامعة نظامها لطيف مش وحشة لو انت بتشتغل مثلا او مسافر بره مصر وعايز اولادك او انت تدرس في مصر من غير حضور.
واعتقد كمان ان نظامها مناسب في الأجواء اللي احنا عايشينها بخصوص كورونا واننا بنخاف من المدرجات اللي فيها 600 طالب قاعدين وشهم في وش بعض.
تعليقات
إرسال تعليق