دشنت الحكومه المصريه عده مشروعات ضخمه لتنميه الاقتصاد النهوض بالصناعه المصريه وتوفير فرص عمل جديده للشباب ومن اهم هذه المشروعات المشروع القومى لتصنيع مشتقات البلازما.
ايه هو المشروع القومي لتصنيع مشتقات البلازما ؟
في البداية لازم تعرف ان 15 دولة فقط في العالم هي اللي بتصنع مشتقات البلازما :
امريكا - كندا - المكسيك - الصين - اليابان - الهند - كوريا الجنوبية - المانيا - فرنسا - بريطانيا - ايطاليا - روسيا - استراليا - اسبانيا - البرازيل
و مصر و جنوب افريقيا بيسعوا انهم ينضموا لقائمة مُصنعي مشتقات البلازما في العالم و يكون لهم الصدارة في ادخال الصناعة دي للمنطقة العربية والافريقية
ايه هي البلازما ومشتقاتها وليه الرئيس اعتبر تصنيعها "حلم" و اهم مشروع قومي بينفذه ؟
=
"بلازما الدم" إحدى مكونات الدم بتشكل حوالى 55% من إجمالى حجم الدم فى جسم الإنسان ليها دور مهم فى انتقال الماء والأملاح والمواد الغذائية والهرمونات وغيرها
"مشتقات البلازما" بتستخدم في علاج امراض الدم من خلال تجزئة البلازما و فصل مكوناتها لغرض استعمال كل مكون حسب الحاجة اليه ، بتستخدم مشتقات البلازما في علاج امراض كتير منها الكبد الوبائي والأيدز و النزيف المزمن (الهيموفيليا) و سرطان الدم (اللوكيميا) و امراض الكلى و بعض حالات الحروق
مصنع (مشتقات الدم) ده اول مصنع شرق اوسطي افريقي جاري تنفيذه بالتعاون مع شركة جريفولز الأسبانية وهيتم افتتاحه يونيو 2023 ، و بالتوازي جاري تنفيذ 12 مركز لتجميع (بلازما الدم) في القاهرة ( مركز العجوزة ، مركز العباسية ، مركز دار السلام ) وفي المنيا وطنطا والإسكندرية والاسماعيلية وسوهاج وقنا و جاري اختيار 8 محافظات أخرى للوصول بالعدد الى 20 مركز خلال سنة
البلاد المُنتجة لمشتقات بلازما الدم بتقوم بتصديرها لكل دول العالم و ده بيعمل ضغط على مصانعها على سبيل المثال مصر عشان تأمن احتياجاتها من مشتقات البلازما كانت بتعمل طلبية قبلها بسنتين كاملين ، المصنع الجديد هيكفي احتياجات مصر و المنطقة و القارة بالكامل
جدير بالذكر ان انشاء مصنع مشتقات البلازما في مصر كان هيبقى من رابع المستحيلات لو لسه الشعب المصري بيعاني من فيروس سي ، انهاردة مصر استلمت شهادة خلو البلاد من فيروس سي وده اللي شجع الشركة الأجنبية انها تنقل التكنولوجيا لمصر
حاليًا مراكز تجميع البلازما شغالة و بتستقبل متبرعين انت كمان تقدر تساعد اصحاب الأمراض الخطيرة و تتبرع ببلازما الدم كل اللي عليك انك تتوجه الى اقرب مركز ليك و تملأ استمارة البيانات الشخصية و هيتم الكشف عليك و يتعملك بعض التحاليل المجانية عشان تطمن على نفسك و يقدروا يعرفوا اذا كنت تقدر تبقى متبرع او لأ ، البلازما بتتجدد في الدم كل ٤٨ ساعة يعني تقدر تتبرع كل اسبوعين بدون حدوث اي مشاكل صحية
امتلاك تكنولوجيا مشتقات البلازما حلم قومي كبير بيقولوا اللي بيملك قوت يومه يملك قراره ما بالك اللي بيملك علاج مرضه.
تعليقات
إرسال تعليق