الاصابه هو البعبع الي بيخاف منه اى رياضى فى اى لعبه لان ببساطه جداً ممكن يدمر مسيرتك الرياضيه عشان كده احنا فى مقال انهارده هنعرض بعض النقط الي هتساعدك تتجنب الاصابات وهنقولك على بعد النصائح الي تعملها لو اتصبت ..
1 - ازاى تتجنب الاصابات :
- الاحماء الجيد : لازم تسخن كويس قبل اى نشاط رياضى لان هيساعد فى حمايتك من الاصابه بنسبه كبيره بجانب انه بيحسن من اداءك وطرق التسخين كتيره منها انك تعمل Dynamic stretching وكنا كتبنا عليها قبل كده بالتفصيل والفرق بينها وبين الـ static stretching هسبلكم لينك المقال فى الكومنت
كمان تقدر تاخد اى تمرين كارديو زى المشايه مثلاً او العجله وتستخدمه فى التسخين لمده 5 او 10 دقائق.
- التعجل فى زياده الاوزان : او بـ البلدى كده الغشوميه فى الاوزان انك عاوز تروح كل اسبوع تشيل اوزان اكتر من الاسبوع الي فات لازم تتأنى فى اختيار وزياده الاوزان مش لازم كل اسبوع تزود اتاكد الاول من صحه التكنيك بتاعك وادى فرصه لمفاصلك انها تتعود على الاوزان عشان تقدر تخش على الوزن الي بعده.
- مدى حركى كامل : انك تادى التمرين بمدى حركى كامل ده هيخليك اقل عرضه للاصابه
- التوازن بين العضلات : لازم يكون عندك توازن فى القوه بين العضلات يعنى مينفعش تهمل تمرين لاى عضله متجيش تهتم بالجزء العلوى من الجسم وتسبلى الرجل.
- الافراط فى التمرين : مينفعش تنزل التمرين كل يوم على الاققل تدى يومين فى الاسبوع راحه تامه لجسمك عشان يقدر يكمل معاك ويفضل كل 6 او 8 اسابيع تاخد اسبوع راحه او ديلود وكنا شرحنا عن الديلود قبل كده هسبلكم اللينك فى الكومنتات
- الاهمال فى التغذيه و شرب المياه
- اهمال تمارين المرونه وهنتكلم عليها فى مقال قدام
2 - تعمل ايه لو اتصبت ؟
- اول حاجه لازم لازم لازم تكشف بلاش اهمال لان هيزود من خطوره الاصابه
- الراحه : والراحه هنا تعنى راحه الجزء المصاب يعنى على سبيل المثال ممكن تكون مصاب فى كتفك وتنزل تمرن الجزء السفلى عادى طبعاً ده فى حاله لو دكتورك معندهوش مانع لحاجه زى كده
- التأهيل : لما تبتدى الاصابه فى الاستشفاء لازم تعملها اعاده تاهيل وطبعاً ديه بتبقى تحت اشراف طبيبك المعالج
- الماء الدافئ : الكمدات السخنه على المنطقه المصابه ده هيساعد فى توسيع الاوعيه الدمويه وده هيدخل كميه دم كبيره للمنطقه المصابه
- تمارين المرونه : ممكن تعمل شويه تمارين للمرونه عشان تحافظ على المدى الحركى بس بشرط تختار تمارين متسببش الالم ولو حسيت بألالم وانت بتمرسها يبقى توقفها على طول وبرضوا يفضل استشاره طبيبك فى اختيار التمارين.
تعليقات
إرسال تعليق