بيقولوا ان للسفر سبع فوايد مش عارف ازاى مش حاطين فيهم فوايد الأكل ازاى يااخوانا
والأكل التركى الصراحة محتاج انك تشمر كمامك وتركز بقى لأنك لو بنحب الأكل ... حقيقى هتنبسط
يلا نشوف افضل اماكن الاكلات فى تركيا
....
simit sarayiده بقى تنزل الصبح بدرى كدة ومتفطرش ف الفندق وتطلع عليه تختارلك اى نوع سميط سادة او محشى م اللى ف الصور دول وتستمتع بريحة المخبوزات الغرقانة ف السمسم وطعمها مع عصيرك او شايك او الكابتشينو بتاعك هتحس بمود تانى
وهتلاقى عندهم شوية اختراعات بالجبن والسوسيس والبطاطس خدها جربها برده بس مش فطار ... سناكس وانت ماشى
HD Iskenderمن اشهر الحاجات اللى مينفعش تروح تركيا ومتجربهاش
طبق كبير عبارة عن قطع عيش فينو صغيرة نص تحميص عليها طبقة جميلة من اللحمة الشرايح الرفيعة جدا معمولة بطريقة غريبة وبيحطوا عليها صوص وزبدة سايحة وجنبها زبادى ... جرب وهتدعيلى
وعندهم شربة عدس زى بتاعتنا جربوها برده هتعجبكم
وبالمناسبة سعر الوجبة حوالى ٥٠ جنيه
Burgerلو انت من محبى البرجر فاوبشن البرجر ف تركيا من الحاجات اللى مينفعش تروح ومتجربهاش
وانا مقصدس ماك وبرجر كينج ... لأنهم زى عندنا بالظبط وغاليين
جرب المحلات العادية اللى ف الشارع هتلاقيها حلوة جدا وخفيفة وسعرها رخيص
الوجبة برده حوالى ٥٠ جنيه
steakلو بتحب اللحوم بصفة خاصة ركز فيها وانت ف تركيا ومتركزش ف الفراخ عندهم قوى لأن اللحمة عندهم مميزة جدا وطعمها وتسويتها وتستها حلوة جدا جدا
الأستيك اللى ف الصور كلته ف محل اسمه steak house ومحلات كتير بتعملها هناك واتفاجأت طبعاً ان دى لحمة ضان (هروف زى مابيقولوا) وهى غالباً عبارة عن ريشة بس الناس دى كرماؤ الريش عندهم كبيرة قوى يابابا
الشاورمة والكوكوريتش واكل الشارع-الشاورمة من الحاجات الحلوة والمميزة ف تركيا ورخيصة وطعمها حلو ... لازم تجربها
-الكوكوريتش ... لو انت مش الناس اللى بتحب تجرب الحاجات جديدة منصحكش تجربه ... هو عبارة عن ممبار زى بتاعنا بالظبط( نفس التاريخ بتاعنا بس تركى وضانى مش بقرى) بس الفرق ان هما مبيحشوهوش هما بينضفوه ويحطوله توابل ويلفوه على سيخ شاورمة بالعرض ويعملوهولك سندوتش
-اكل الشارع ... هتلاقى ناس بعربيات صغيرة بتعمل سجق ومينى برجر وكفتة جربها وانت ماشى هتعجبك
الاسماكانا جربت السمك هناك ف المكان اللى ف الصور بس بناءا على ترشيحات trip advisor بس الحق يتقال كان خرافة
لازم تجربوا الجمبرى بالزبدة والسبيط المقلى(طلع مبيشدش) والسلمون واستيك التونة كانوا مش طبيعيين
المشوياتالمشويات هناك من الحاجات الحلوة جدا خصوصا انهم بيحطوا مكسرات ف الكفتة كتير
ومن الاكلات اللى سعرها رخيص (وجبة فرد حوالى ١٠٠ جنيه بالكتير)
وطبعا ابعد عن بوراك لأنه غالى جدا جدا ( نفس الوجبة ب ٤٠٠جنيه )ومبقاش حلو زى الاول ومش هتلاقى بوراك نفسه لو رايح تتصور معاه
......
كدة احنا خلصنا الحادق .... تعالوا للحلو بقى
Zain kunafeالراجل ده سبحان الله عليه وعلى رزقه
محل صغير جدا على بوابة مسجد الفاتح تروح تلاقى طابور بتاع ٥٠ متر ومعندوش اوبشن اختيار
بتديله ٥ ليرة بيديك طبق فيه قطعة نابلسية وقطعة متعرفش هى بقلاوة ولا بسبوسة بالقشطة وعليهم زبدة سايحة تاكلهم وانت واقف وسبحان الله على جمال طعمهم
مينفعش تروح ومتجربوش
Hafiz mostafaده قصة وحكاية وحدوتة لوحده .. هو غالى شويتين بس المود اللى بيعمله يستاهل
الناس دى عندهم الفستق ببلاش باين ... جرب اى حاجة بالفسدق مع ايس كريم وهتدعيلى ووانت راجع مصر خد من عنده طبق شرقى للبيت وطلعه معاك الطيارة ... اهلك هيتبسطوا جدا بيه
ومتنساش وانت هناك تجرب Mado
من الاماكن اللى هتحب الايس كريم بتاعها والحلويات هناك عموماً
الحلقوم (الملبن)ده بقى اختراع ياكوتش بس نصيحة هاته م السوق المصرى وهتلاقى كل المحلات بتدوقك
دوق عند كذا حد لحد ما تلاقى اكتر حاجة طازة وسكرها قليل وفاصل لأن المصريين والسوريين هناك عارفيننا فبيرفعوا ف السعر
تعليقات
إرسال تعليق