نستعرض لكم اليوم طريقه عمل السى فى بطريقه احترافيه لزياده فرض القبول فى الشركات والبنوك والاماكن المختلفه من خلال مجموعه من النصائح الهامه
فى الأول لازم نعرف أيه هو ال CV ده ؟
هو إختصار ل Curriculum Vitae
ومعناها : السيرة الذاتية.
دى عاملة بالظبط زى بطاقة الرقم القومى، يعنى دى وسيلة التواصل بينك وبين صاحب المنظمة أو المكان إللى عاوز تشتغل أو تدرب فيه.
وده لإن سيادتك بتكون كاتب فيه كل بياناتك زى ما هوضح دلوقتى.
طيب أزاى نعمل CV كويس من غير أى كلكعة أو عقد ؟
اللغة المتعارف عليها لعمل ال CV هى الإنجليزية، إلا لو كان المكان طالبه عربى.
ال CV بيتكون من :-
( 1 ) أسمك و تحته :-
عنوانك زى كده
Egypt. Sohag, Tahta
ورقم تليفونك
وال Email بتاعك ويكون فورمال ( بإسمك )
تاريخ ميلادك
November, 22, 1997
ويا سلام بقى لو تكتب كمان لينك حسابك على لينكد إن ( ويكون محترم )
( 2 ) تكتب ال Objective
وده بتوصف فيه تطلعاتك وأزاى هتفيد الشركة إللى عاوز تشتغل فيها.
( 3 ) تكتب ال Experiences
وده بتكتب فيه خبراتك من الأحدث للأقدم وبتكتب أسم المكان وشغلك كان أيه و مدة شغلك ، فى حالة لو كنت فعلاً إشتغلت وعندك خبرة، أما لو لسه طالب أو مشاركتش فى حاجة يبقى متكتبش الجزء ده.
( 4 ) تكتب ال Education
وده بتكتب فيه تعليمك أيه وإتخرجت أمتى ( لو خريج )
ولو تقديرك أقل من جيد يفضل متكتبهوش.
( 5 ) تكتب ال Language
وده بتكتب فيه اللغة الأم ( العربى ) والإنجلش ومستواك فيه.
( 6 ) تكتب ال Skills ودى هنقسمها ل :-
ال Personal Skills ودى بتكتب فيها كل مهاراتك.
ال Technical Skills ودى بتكتب فيها المهارات إللى عند سيادتك وتخص الوظيفة إللى مقدم عليها.
ال Computer بتكتب فيها أى مهارات عندك تخص مجال الكمبيوتر.
( 7 ) تكتب ال Activities ( من الأحدث للأقدم )
ودى بتكتب فيها حاجة مهمة جداً ، وهتسند معاك لو معندكش خبرة ، وهى الأنشطة التطوعية ، وبتكتب فيها أسم المكان و شغلك أيه و المدة الزمنية.
( 8 ) جزء التدريبات ( من الأحدث للأقدم ) : فى حالة لو كنت لسه طالب هتكتب ( Internship ) ولو كنت خريج تكتب ( Training ) وتكتب تحتهم أسم المكان و المدة الزمنية و شغلك كان أيه فى المكان ده.
( 9 ) تكتب ال Courses
وده بتكتب فيه الكورسات إللى أخدتها ومدتها وإستفادتك من الكورس أيه
( 10 ) تكتب ال Hobbies
وده بتكتب فيه هواياتك ويفضل لو كانت العلمية.
كام ملحوظة :-
( 1 ) ال Email لازم يكون فورمال ( بإسمك )
( 2 ) لازم ال CV يتعمل على برنامج ال Word وحذارى من الألوان والمواقع.
( 3 ) أوعى أوعى أوعى تكتب حاجة مش موجودة عندك لإن هيتم سؤالك فى كل حرف كاتبه.
( 4 ) مينفعش حد يعملك ال CV لإن ده بيعبر عنك ، إلا لو مش بتعرف تكتب Word وساعتها تكون قاعد جنبه.
( 5 ) لما تيجى تبعت ال CV لازم تكون صيغته PDF ويكون متسمى بإسمك من بره.
( 6 ) 90% من الأماكن بتحتاح منك CV حتى لو طالب وبتقدم على تدريب وليكن التدريبات الصيفية للبنوك ، علشان كده لازم دلوقتى يكون عندك CV محترم حتى لو لسه طالب.
( 7 ) حجم الخط يكون أكبر فى أسمك عن باقى الكلام.
( 8 ) متحطش صورتك غير لو مطلوبة وتكون فورمال.
( 9 ) ال CV مش مرتبط بعدد صفحات ، كل ما خبراتك أكبر كل ما عدد الورق هيكتر.
تعليقات
إرسال تعليق