ايه هى منحه iti ؟؟
هى عبارة عن منحة دراسية مدتها 9 شهور مقدمة من وزارة الاتصالات بالتعاون مع معهد تكنولوجيا المعلومات iTi
----------------
ايه هو الهدف منها؟؟
اعداد خريجين فى مجال تكنولوجيا المعلومات قادرين على المنافسة عالميا يعنى هى خاصة بتكنولوجيا المعلومات وملهاش فى المجالات الادارية يعنى مثلا مفيهاش تخصص ادارة يعنى اللى شايف نفسه بيحب الكمبيوتر لدرجه يبقى هو كمبيوتر وحياته كمبيوتر وشغله كمبيوتر يقدم وان شاء الله يكون له نصيب فيها
----------------
طب هى المنحة دى هتضيفلى ايه ( ايه اهميتها بالنسبة لى ) ؟؟
المنحة دى كلها مميزات افضل منحة فى مصر و بتاخد مرتب اثناء فترة الدراسة بالكامل لو تقديرك التراكمى جيد هتاخد 600لو جيد جدا 800لو امتياز 1000 يعنى بتتعلم وكمان بتاخد مرتب
مكانة علمية مرتفعة يعنى هتتعلم منها كتييير اوى ومش هتلاقيه فى اى مكان برة وكمان فى اقسام مفيش خريجين منها الا من الأى تى أى فقط ومفيش اى مكان فى مصر بيطلع الناس دى مش هتدرسها أى مكان تانى
و أهم ميزة فيهم كلهم الاى تى اى مش مجرد منحة او كورس لا دى دبلومة يعنى دراسات عليا يعنى لو حبيت تكمل ماجستير الاى تى اى بتأهلك انك تكمل ماجستير فى جامعة نوتينجهام انجلترا أو بادربون المانيا بالنسبة لقسم ميكاترونيكس
------------------
ايه هى شروطها؟
- خريج احد الجامعات او المعاهد المصرية المعترف بيها كشهادة عليا وان يكون خريج اخر خمس سنوات من بداية 2015
- التقدير التراكمى لشهادة الكلية جيد على الاقل
- تم تحديد موقف التجنيد بالنسبة للذكور بالنسبة لمواليد شهر (1: 6 ) نص اول ممكن يقدموا فى المنحة لان الارجاء يتم قبل بدء الدراسة وبكدة هتعرف تأجيل ولا هتخش قبل المنحة أما بالنسبة لمواليد شهر (7 الى 12 ) نص تانى ممكن يقدموا فى حالة وجود سبب يمنعهم عن الجيش اما غير كدة يستعدوا للتقديم السنة اللى جاية مش المرة دى
- مصرى الجنسية
- التفرغ الكامل أثناء وقت المنحه
----------------
الاوراق المطلوبة :
- صورة البطاقة او الباسبور
- صورة شهادة التخرج او بيان نجاح او النتيجة مطبوعة مذكور فيها التقدير التراكمى
- صورة موقف التجنيد بالنسبة للذكور
- شهادة التويفل ان وجدت
- صورة شهادة الميلاد
-------------------
ومن الاسئله اللى وصلتنا في الكومنتات ورسائل المدونة :
مستوفي كل الشروط بس مش معايا شهاده التويفل .. ينفع اقدم ؟
- طبعا ينفع لانها مش ضروريه عند التقديم .. وبعد القبول تقدر تمتحن وتقدمها للمعهد
-----------------
خريج ما قبل 2012 ينفع أقدم للمنحه السنه دى؟
- حسب شروط المنحه لا.. لكن العام الماضى المنحه اتمدت 5 سنوات بدل 3 سنوات سابقه فى التخرج فالافضل تنتظر شروط المنحه الجديده
----------------
مستوفى كل الشروط بس تقديرى مقبول اقدم ولا لا ؟
- العام الماضى فتحوا تراكات وقبلوا فيها الخريجين تقدير مقبول .. فالافضل تنتظر شروط المنحه الجديده وان شاء الله يكون لك نصيب
---------------
خريج السنه دى ولسه نتيجتى مظهرتش .. ينفع أقدم ؟
- لو نتيجتك هتظهر فى الفتره اللى هيتفتح فيها باب التقديم (غالبا بتكون من منتصف يوليو لمنتصف اغسطس) قدم
--------------
مصاريف المنحه كام ؟
- المنحه مجانيه بالكامل لمستوفى الشروط ومقدمه من وزاره الاتصالات
--------------
موظف وعاوز اقدم فى المنحه ينفع ولا لا ؟
- اى حد مستوفى الشروط يقدم بس المنحه تحتاج التفرغ التام لان نظام الدراسه يومى من 8:30 صباحا ل 3:30 واحيانا 5:30 مساءا
--------------
المعهد دا فروعه فين وعناوينها ؟ واواى نتواصل معاهم
- المعهد مقره الرئيسى فى القريه الذكيه وله فرع فى شيراتون وفروع فى عده محافظات زي الاسكندريه والمنصوره واسيوط والاسماعيليه
لو عاوز تعرف العنوان تحديدا او تستفسر منهم على اى حاجه اتصل عليهم على الارقام دى :
ITI- Head Quarter
Smart Village - 28 Km by Cairo / Alexandria Desert Road - 6 October - Building B148
Tel: +202-353-55656
ITIinfo@iti.gov.eg
Alexandria
1 Mahmoud Said St., Shohada Square, Main Post Office Building, Alexandria.
Tel: +203-3906924 - Fax: +203-3906924
ITIinfo@iti.gov.eg
Mansoura
Mansoura University, Faculty of Computers & Information Sciences.
Tel: +2050-2202474 / +2050-2203217- Fax: +2050-2364279
ITIinfo@iti.gov.eg
Assuit
Assuit University, Network Information Building, Assuit.
Tel: +2088-2374264/5 - Fax: +2088-2374264
ITIinfo@iti.gov.eg
Ismailia
Suez-Canal University, Sports Activity Building, Confucius Institute
Tel: +2 064 9203357 - +2 064 9203358
ITIinfo@iti.gov.eg
-------------
خريج كليه غير متخصصه (تجاره – حقوق- اداب وهكذا ...) وعرفت ان المنحه دى لحاسبات وهندسه بس هل دا صحيح ؟
- لا يا فندم مش صحيح .. المنحه مش بتشترط كليه معينه
-------------
باب التقديم هيفتح امتى وبيفضل قد ايه ؟
- لسه م اعلنوش عنه بس فى الغالب من منتصف يوليو لمنتصف اغسطس .. تابعنا الفتره الجايه واول ما يعلنوا عنها هنزل بوست مخصوص
------------
لسه طالب فى الجامعه وبدرس.. ينفع اقدم ؟
- المنحه للخريجين فقط .. كمل دراستك الأول وبعد كده المنحه ان شاء الله
------------
هى المنحه دى كل سنه ولا السنه دى بس ؟
- المنحه بتقدم كل عام ولحد دلوقتى اتخرج منها 36 دفعه
------------
غير حامل للجنسيه المصريه .. ينفع اقدم ؟
- سمعنا انه ينفع تدرس بعض التراكات بمقابل مادي بس حقيقي مش متاكدين .. تقدر تتصل بيهم وتسالهم وهما هيجاوبوا على كل استفساراتك
تعليقات
إرسال تعليق