هنتكلم النهاردة معاكم إن شاء الله عن جزء من أهم أهم أهم الأجزاء الخاصة بالستوردج ألا وهو الـ RAID
أيوه .. الـ RAID
الـ RAID
اختصار لـ Redundant Array Independent Disks
ويُفهم من اسمه إنه مُصَمَم لحفظ الداتا على الهارد ديسك لو الهارد ديسك لا قدر الله حصل له تلف .
وتفصيلاً الـ RAID
عبارة عن تكنيك (يعنى شئ لوجيكال) من خلاله تقدر تجمَّع عدد من الهاردات فى كيان واحد اسمه الـ RAID set
وتقدر تكتب عليهم داتا وتقرا منهم داتا .. الهاردات دى فقط دون غيرها .
يعنى لو عندك فى الداتا سنتر 40 هارد فانت ممكن تطبق الـ RAID
عليهم كلهم أو بعضهم As u like
ومن الأخر .. الـ RAID
بيعمل حاجتين
1- يحفظ الداتا من الضياع والفقد
2- يزود الـ Disks Performance
وانت ممكن تستفيد بواحدة من الاتنين أو الاتنين مع بعض زى ما هنشوف فى الشرح .
طيب هو ازاى الـ RAID
بيزود الـ Performance ؟
وبيحفظ الداتا على الهارد اللى تلف أو اتحرق ازاى ؟
سؤال جميل .. تعالى نشوف سوا
عندنا
( 3 RAID Techniques )
أول تكنيك اسمه الـ Striping
اللى فى الصورة اللى على الشمال
وفى التكنيك ده لو عندنا 4 هاردات فالداتا بتتخزن عليهم كلهم .. يعنى انت لو عايز تخزن ملف مساحته 20 ميجا .. الـ 20 ميجا هيتقسموا على الـ 4 هاردات كل هارد هيخزن 5 ميجا .
هتسأل وتقول ده هيفيد فى ايه ؟
هجاوبك وأقولك إن كده انت لما تحتاج تقرأ الداتا دى فالـ Request
بتاع طلب الداتا هيتم بسرعة الـ 4 هاردات فى وقت واحد
يعنى لو كانت الداتا اللى مساحتها 20 ميجا متخزنة على هارد واحد والـ Request
بتاعك هيستغرق ثانية واحدة.. من خلال تكنيك الـ Striping
هيستغرق ثانية مقسومة على 4 يعنى رُبع ثانية وده طبعاً بيفرق مع المؤسسات اللى جزء من الثانية بيفرق معاها زى البورصة والتعاملات التجارية الخاصة بشراء الأسهم وخلافه .
التكنيك ده ميزته الـ High Performance 
وعيبه إن مافيش Protection
يعنى لو هارد واحد تلف يبقى كل الداتا ضاعت(وضاعت فلوسك يا صابر)
وده كده شرح إن ازاى نستفيد من الـ Performance
أوعى تكون تعبت كمل ياراجل .. التعليم مش بالساهل.
تانى تكنيك اسمه الـ Mirroring وده سهل جداً جداً
ومن اسمه تقدر تستنتجه
ده معناه إنك هتجيب مساحة تخزينية بديلة وجاهزة للإستخدام فى أى وقت .
يعنى الشغل محتاج مساحة 10 Terabytes
يبقى انت هتجيب مساحة تانية 10 Terabytes
ليكون مجموع السعات التخزينية عندك 20 Terabytes
بحيث إن الداتا اللى تتخزن على الهارد الأول ... تتنقل منها مباشرة نسخة على الهارد التانى ولو الهارد الأول حصل له تلف.. التانى يكون موجود وبالتالى الداتا كده مش هتضيع
التكنيك ده ميزته الـ Protection
وعيبه الـ Low Performance
والـ Cost لأنك هتشترى ضعف المساحة التخزينية
ده فى الصورة رقم 2 اللى فى الوسط.
تالت وأخر تكنيك اسمه الـ Parity
وركز معايا فى ده شوية
عارف انت المعادلات
س+ص=5
وافترض إن س =3 إذاً ص = ؟
هتقولى ص= 5-3 =2
وهى دى طريقة شغل الـ Parity
إنه بيخزن الداتا على مجموعة هاردات اللى هى الـ RAID set
وفى جزء اسمه الـ Parity
بيكون خاص بكل عملية تخزين, فيه معلومات عن الداتا
وبالتالى لو هارد من الهاردات اللى عليها الداتا حصل له ضرر ممكن من خلال الداتا اللى موجودة على باقى الهاردات + المعلومات اللى عندك عن الداتا المفقودة يقدر يسترجع الجزء اللى ضاع منه .
ده طبعاً بيكون عبارة عن XOR Gates
هتلاقيه صورته اللى على اليمين .
وده ميزته الـ Protection and Performance
تعليقات
إرسال تعليق